బొత్స రోడ్‌మ్యాప్ కసరత్తు

Posted: 07/06/2013 09:24 PM IST

కాంగ్రెసు ఆంధ్రప్రదేశ్ వ్యవహారాల ఇంచార్జీ దిగ్విజయ్ తెలంగాణ ఏర్పాటు పై రోడ్డు మ్యాప్ రెడీ చెయ్యండని .. సీఎం కిరణ్ కుమార్ రెడ్డికి, బొత్స సత్యనారాయణకు అప్పగించారు. ఎంత త్వరగా రోడ్డు మ్యాప్ ఇస్తే అంత త్వరగా తెలంగాణ పై నిర్ణయం ప్రకటిస్తాం అని దిగ్గిరాజు చెప్పటం జరిగింది. తెలంగాణపై రోడ్ మ్యాప్ కసరత్తులో బొత్స మునిగిపోయారు. ఇందులో భాగంగానే ఆయన ఢిల్లీకి చేరుకున్నట్లు అర్థమవుతోంది. ఆయన పలు దఫాలుగా సీమాంధ్రకు చెందిన పలువురు కేంద్ర మంత్రులు, పార్టీ పార్లమెంటు సభ్యులతో సమావేశమయ్యారు. తెలంగాణపై రోడ్ మ్యాప్ తయారు చేయాలని కాంగ్రెసు ఆంధ్రప్రదేశ్ వ్యవహారాల ఇంచార్జీ దిగ్విజయ్ సింగ్ ముఖ్యమంత్రి కిరణ్ కుమార్ రెడ్డి, పిసిసి అధ్యక్షుడు బొత్స సత్యనారాయణ, ఉప ముఖ్యమంత్రి దామోదర రాజనర్సింహలకు సూచించిన విషయం తెలిసిందే. కేంద్ర మంత్రి కావూరి సాంబశివ రావుతో బొత్స సత్యనారాయణ దాదాపు 45 నిమిషాల పాటు సమావేశమయ్యారు. కావూరి సాంబశివరావు గతంలో సమైక్యవాదాన్ని గట్టిగా వినిపించారు. కేంద్ర మంత్రిగా పదవీ బాధ్యతలు చేపట్టిన తర్వాత తెలంగాణ సమస్యపై అధిష్టానం తీసుకునే నిర్ణయానికి కట్టుబడి ఉంటానని కావూరి సాంబశివరావు చెప్పారు. ఈ స్థితిలో బొత్సకు, కావూరికి మధ్య జరిగిన చర్చల వివరాలు తెలియడం లేదు. కేంద్ర మంత్రులు దగ్గుబాటి పురంధేశ్వరి, పల్లంరాజు, కోట్ల సూర్యప్రకాశ్ రెడ్డి, జెడి శీలంతో బొత్స సత్యనారాయణ సమావేశమయ్యారు. ఒక్కొక్కరితో అరగంట పాటు మాట్లాడారు. కొంత మంది సీనియర్ పార్లమెంటు సభ్యులతో కూడా ఆయన సమావేశమయ్యారు.