ఢిల్లీలో వేడెక్కిన ఆంధ్రా పంచాయితీ

Posted: 06/04/2013 08:55 PM IST

పిసిసి అధ్యక్షుడు బొత్స సత్యనారాయణ, కేంద్ర మంత్రి చిరంజీవి ఆజాద్‌తో సమావేశమయ్యారు. డిఎల్ రవీంద్రా రెడ్డి బర్తరఫ్‌ను వ్యతిరేకిస్తున్న రాష్ట్ర నాయకులు మొత్తం ఢిల్లీకి చేరినట్లు భావిస్తున్నారు. డిఎల్ రవీంద్రారెడ్డిని బర్తరఫ్ చేయడాన్ని బొత్స సత్యనారాయణ కూడా వ్యతిరేకిస్తున్నారు. ఉప ముఖ్యమంత్రి దామోదర రాజనర్సింహ, సీనియర్ మంత్రి కె. జనా రెడ్డి కూడా డిఎల్ రవీంద్రా రెడ్డిని మంత్రివర్గం నుంచి బర్తరఫ్ చేయడాన్ని వ్యతిరేకిస్తున్నారు. రాష్ట్ర నాయకులతో చర్చలతో కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ రెండు రోజులుగా తీరిక లేకుండా ఉన్నారు. జానారెడ్డి, పార్లమెంటు సభ్యుడు సిరిసిల్ల రాజయ్య ఆజాద్‌తో సమావేశమయ్యారు. పంచాయతీ ఎన్నికల గురించి చర్చించడానికే తనను ఆజాద్ ఢిల్లీకి ఆహ్వానించినట్లు జానా రెడ్డి చెప్పారు. ముఖ్యమంత్రి కిరణ్ కుమార్ రెడ్డి ఢిల్లీ వస్తున్నారు. ఆయనతో డిఎల్ రవీంద్రా రెడ్డి బర్తరఫ్ తర్వాత తలెత్తిన పరిణామాలపై, తెలంగాణపై ఆజాద్ చర్చించే అవకాశం ఉన్నట్లు తెలుస్తోంది. మొత్తం ఢిల్లీలో ఆంద్రా రాజకీయలతో వేడెక్కినట్లు సమాచారం. డీఎల్ బర్తరఫ్‌ చెయ్యటం కాంగ్రెస్ మంత్రులు వ్యతిరేకిస్తున్నారు. దీనిపై కాంగ్రెస్ అధిష్టానం రేపు నిర్ణయం తీసుకుంటుందని ఢిల్లీ నాయకులు అంటున్నారు.