మహేష్‌ సామాజిక బాధ్యత

Posted: 05/07/2013 09:21 AM IST

మహిళలకు అండగా ప్రిన్స్ మహేష్ బాబు మాటల్లో చెబుతున్నాడు. యువతులపై అత్యాచారాలు, వేధింపులు తరచూ వింటున్నాం. ఇక స్త్రీలపై వివక్ష చూపుతున్న ఘటనలూ చోటు చేసుకొంటున్నాయి . వీటిని ఎదురించటానికి టాలీవుడ్ హీరో ప్రిన్స్ మహేష్ బాబు నడుం బిగిస్తున్నారు. అసలే షూటింగ్‌లతో తామెంత బిజీగా ఉన్నప్పటికీ, కొందరు తారలు సామాజిక సేవా కార్యక్రమాలలో కూడా పాలుపంచుకోవడం చూస్తూనేవున్నాం. అప్పట్లో పాతతరం తారలు మొదలుకుని నేటి తారల వరకు సామాజిక బాధ్యతను సంతోషంగా స్వీకరించిన సందర్భాలు కోకొల్లలు ఉన్నాయి. ఇప్పటికే ఆ వరుసలో మహేష్‌కూడా ఉన్నారు. తనకంటూ ఓ ప్రత్యేక ఇమేజ్‌ను సొంతం చేసుకున్న మహేష్‌బాబు ఇటు సినిమాలతోను, అటు వ్యాపార ప్రకటనలతోను ఎంత బిజీగా ఉన్నారో వేరుగా చెప్పనక్కరలేదు. అయినప్పటికీ, లోగడ ఓ సారి శిశువులకు మూలకణ వైద్యం ఆవశ్యకతను వెల్లడించే కార్యక్రమంలో పాల్గొన్నారు.

ఆ మధ్య తమకు ఆడ శిశువు జన్మించిన సందర్భంలో మహేష్‌, నమ్రత దంపతులు ఈ మూలకణ వైద్యాన్ని ప్రచారం చేశారు. కాగా మరోసారి సామాజిక బాధ్యతతో ఓ మంచి కార్యక్రమానికి మహేష్‌బాబు చేయూతనిస్తున్నట్లు తెలిసింది. దేశంలో రోజురోజుకీ మహిళల పట్ల హింసాత్మక సంఘటనలు, లైంగిక దాడులు పెరిగిపోతున్న నేపథ్యంలో సమాజంలో చైతన్యం తెచ్చేందుకు మార్డ్‌ (మెన్‌ అగెనిస్ట్‌ రేప్‌ అండ్‌ డిస్క్రిమినేషన్‌) అనే పేరుతో ఓ సంస్థను బాలీవుడ్‌ రచయిత, దర్శకుడు అక్తర్‌ నెలకొల్పారు.

దీనికి ప్రధాన ప్రచారకర్తగా బాలీవుడ్‌ నటుడు షారుక్‌ఖాన్‌ వ్యవహరిస్తున్నారు. ఇక తెలుగు సినీరంగం నుంచి ఎంతో క్రేజ్‌ కలిగిన మహేష్‌బాబు అయితే బావుంటుందని భావించి, ఆయనను సంప్రదించారట. ఈ చైతన్య కార్యక్రమం తెలుగువెర్షన్‌కు వాయిస్‌ ఇవ్వడానికి మహేష్‌బాబు సంతోషంగా అంగీకరించారని అంటున్నారు. మహేష్‌బాబు ద్వారా ఆంధ్రప్రదేశ్‌లోని ప్రజలకు తమ సంస్థ ఆశయం చేరువకాగలదని అక్తర్‌ భావిస్తున్నారట.