Posted: 03/28/2013 05:23 PM IST

2000 కోట్ల టాక్స్ బాకీ ఉందని , ఒక వారంలోగా ఆ మొత్తాన్ని కట్టమని ఆదాయ పన్ను శాఖ నోకియా కంపెనీకి మార్చి 21 న ఇచ్చిన నోటీసుని సవాల్ చేస్తూ నోకియా కంపెనీ హైకోర్ట్ లో పిటిషన్ దాఖలు చెయ్యగా హైకోర్ట్ ఇంటరిమ్ స్టే ఇచ్చింది.

వ్యాపారానికి సంబంధించి అన్ని నియమాలనూ పాటిస్తున్నామని నోకియా చెప్తోంది. ఫిన్ ల్యాండ్ కి చెందిన నోకియా సంస్థ, తాము స్థానిక వ్యాపార నియమాలను, రెండు దేశాల మధ్య ఉన్న పన్ను ఒప్పందాలను పూర్తిగా అనుసరిస్తూ నడుచుకుంటున్నామని కోర్టులో వాదించింది.

నోకియా వేసిన రిట్ మీద విచారణ చేసిన ఢిల్లీ హైకోర్టు ఇంటరిమ్ స్టే ఇవ్వటమే కాకుండా, నోకియా ప్రకటిస్తున్నదానికి ప్రతివాదనను అఫిడవిట్ గా ఇవ్వమని ఆదాయ పన్ను శాఖను ఆదేశించింది. ఆదాయపన్ను శాఖకు అలా పన్ను కట్టటానికి గడువుని నిర్దేశించే అధికారాలున్నాయని, దాని ప్రకారమే నోటీసు ఇవ్వటం జరిగిందని ఆ శాఖ అంటోంది.

ఇంతకీ ఆదాయపన్ను శాఖ అడుగుతున్న సొమ్ము టిడిఎస్ కి చెందినది.   చెన్నై లో స్థాపించిన నోకియా సాఫ్ట్ వేర్ వాడుతున్నందుకుగాను తన పేరెంట్ కంపెనీకి కట్టే రాయల్టీ మీద 10 శాతం టాక్స్ తీసివేసి దాన్ని ఆదాయపన్ను శాఖకు కట్టవలసివుంది. అది కట్టటం లేదని ఆదాయ పన్ను శాఖ వాదన. దీనికోసం ఆ శాఖ అధికారులు జనవరిలోనే దర్యాప్తు చేసి నోకియా కార్యాలయంలో దానికి సంబంధించిన పరిశీలనలు చేసారని, పన్ను ఎగవేతను పరిశీలించిన తర్వాతనే నోటీసులిచ్చారని చెప్పారు.

-శ్రీజ