Posted: 03/17/2013 02:42 PM IST

జీతభత్యాలు లేని ఉద్యోగం గృహిణులదే.  వెట్టి చాకిరీ అంటే వాళ్ళదే అంటూ కొన్ని మహిళా సంఘాలు నిరసిస్తూ అన్నదాంట్లో సత్యం లేకపోలేదు.  ఇంటి పనిలో ఇంట్లో ఇంట్లోనే ఎన్ని కిలోమీటర్లు నడుస్తారు, ఎన్ని సార్లు వంగి లేస్తారు, వంటవార్పుల్లో ఎంత రిస్క్ తీసుకుంటారు, అన్నిటికన్నా మించి కడుపుతో ఉన్నప్పటి సంగతి వదిలేసినా చిన్న పిల్లలను కన్న దగ్గర్నుంచీ పెద్దై వాళ్ళ పనులు వాళ్ళు చేసుకునేంత వరకూ వాళ్ళకి ఎన్ని సేవలు చేస్తారు.  ఇవన్నీ చెయ్యటానికి మమతానురాగాలు కారణమే అయినా, ఎంత ఓర్పు, ఎంత నేర్పు, ఎంత శ్రమ అందులో దాగి వున్నాయి.  

మగవాళ్ళు మాత్రమే ఉద్యోగ వ్యాపారాలు చేసే ఇళ్ళల్లో ఆ ఆదాయమంతా మగవాళ్ళదే ఎలా అవుతుంది.  వాళ్ళు అలా బయటకు పోయి పని చేసుకోవటానికి వీలుగా ఇంట్లో ఉండి అన్ని విధాలుగా సహకరించిందెవరు.

మగవాళ్ళతో ఆడవాళ్ళు సమానమని పైకి అంటున్నా, వాస్తవంలోకి వచ్చేటప్పటికి మహిళలకు నిజంగా సమాన హోదా లభిస్తోందా?  భర్త వదిలిపెట్టినట్టయితే భార్యకు నెల నెలా భరణం ఇవ్వాలన్న నియమం ఉంది కదా అది ఎంత వరకు అమలు లోకి వస్తోందన్నది పక్కన పెడితే, భర్తతో కలిసి వున్నప్పుడు కూడా ఆమె చేసే పనికి భర్త ఆదాయంలోంచి కొంత భాగం ఆటోమేటిక్ గా ఆమె బ్యాంక్ ఖాతాలోకి పోయే వీలుంటే ఎలా ఉంటుంది?  ఆర్థిక స్వాతంత్య్రం రావాలంటే ఇలాంటి ఏర్పాట్లు చెయ్యాలని కొందరు సంఘ సంస్కర్తల భావన.  భర్త చనిపోతే ఆస్తిలో వాటా వస్తుంది కానీ  బ్రతికున్నప్పుడే అలా ఆదాయంలో వాటా ఇచ్చేస్తే స్త్రీకి ఎంత స్వాతంత్య్రం లభిస్తుంది.

ఇంటుపట్టునుండే గృహిణులకే కాదు, బయటకు పోయి ఉద్యోగం చేసే మహిళలకు కూడా ఇంట్లో చాకిరీ తప్పదు, పిల్లలను కని పెంచటం అసలే తప్పదు.  అందువలన, వాళ్ళకి ఆదాయం ఉన్నా లేకపోయినా, భర్త ఆదాయం లోంచి కొంత భాగం ఎప్పటి కప్పుడు ఆమె ఖాతాలోకి వెళ్ళే నగదు బదిలీ ఏర్పాటు వలన డబ్బు కోసం చెయి చాచవలసిన అవసరం ఉండదు.  

పిల్లలను కన్న ప్రతిసారీ, పెంచుతున్న సమయంలోనూ ఇంట్లో చేసే పనులకు ఆదాయంలో వారి వాటా వారికి వచ్చేస్తే మహిళలకు ఆర్థిక స్వాతంత్య్రం దానంతట అదే వచ్చేస్తుంది.  

ఈ ఏర్పాటు వలన మరో లాభం కూడా ఉంది.  మహిళలు ఇంటి వరకే పరిమితమై ఉండటానికే ఎక్కువ మంది ఇష్టపడతారు.  దానివలన పురుషులకు ఉద్యోగావకాశలు ఎక్కువౌతాయి.  

ప్రతి మగవాడి విజయం వెనక ఒక మహిళ ఉంటుందని ఒప్పుకుని చప్పట్లు కొట్టి సత్కరించినంత మాత్రాన సరిపోదేమో, పని వేళలు, వారాంతపు శలవులు ఎలాగూ లేవు కదా, వాళ్ళ వాటా వాళ్ళకి ఆర్థికంగా కూడా ఎప్పటికప్పుడు ఇచ్చేస్తే బావుంటుందేమో..... ఒక్క సారి నిదానంగా ఆలోచించండి

-శ్రీజ