Posted: 03/17/2013 09:57 AM IST

అత్యాచారానికి గురైన అమ్మాయి కాల్చుకుని చనిపోయిన ఘటనకు బాధ్యులెవరన్నది తేలాలి! 

తొమ్మిదవ తరగతి విద్యార్థిని మీద ముగ్గురు వ్యక్తులు దాడి చేసి ఆమె బట్టలు చింపి లైంగికంగా వేధించగా ఆ అమ్మాయి నిన్న చనిపోయింది.  అయితే ఆ అమ్మాయి చనిపోవటానికి నిజమైన బాధ్యులెవరు అన్నది తేలవలసివుంది.

జరిగిన సంఘటనను సవివరంగా బాధితురాలి ఫొటోతో సహా ఒక హిందీ పేపర్లో ప్రచురించారు అత్యుత్సాహంగా, బాధ్యతా రహితంగా పని చేసిన ఒక దినపత్రికవాళ్ళు.  అది చూసిన బాధితురాలు జరిగిన దానికి కలుగుతున్న మనస్తాపం మరింత ఎక్కువై, జరుగుతున్న ప్రచారానికి వేదన గురై తనకు తాను నిప్పు అంటించుకుంది.  90 శాతం గాయాలతో హాస్పిటల్ లో చికిత్స పొందుతున్న ఆ అమ్మాయి నిన్న చనిపోయింది.  

మురాదాబాద్ సివిల్ లైన్స్ ఇన్స్పెక్టర్ సతీష్ కుమార్ తెలియజేసిన దాని ప్రకారం, పోయిన సోమవారం అత్యాచారానికి గురైన ఆ అమ్మాయి ఇచ్చిన ఫిర్యాదు మేరకు నిందితులు ముగ్గురునీ పోలీసులు అదుపులోకి తీసుకున్నారు.  పేపర్లో పడ్డ వార్తను చూసి ఆమె బుధవారం నాడు తనకు తాను నిప్పు అంటించుకుంది.  వెంటనే స్థానిక ప్రభుత్వ హాస్పిటల్ లో చేర్చారు.   ఆ తర్వాత ఢిల్లీ సఫ్దర్ జంగ్ హాస్పిటల్ కి తరలించారు.  అక్కడ చికిత్స పొందుతూ ఆ బాధితురాలు నిన్న ప్రాణాలు వదిలింది.  

బాధితురాలు అంటే ఆ బాధను నిజంగా కలిగించినవారు ఎవరు?  వేధించిన ముగ్గురు యువకులా లేక జరిగిన అవమానాన్ని ప్రచారం చేసిన హిందీ దిన పత్రికా?  దిన పత్రికను నడుపుతున్న వాళ్ళకి శిక్ష విధిస్తే వేధించిన యువకులకు శిక్ష ఉండదా?  శిక్ష వాళ్ళకేనా, దినపత్రిక యాజమాన్యానికి ఉండదా?  ఈ విషయంలో చట్టం చాలా స్పష్టంగా ఉంది.

ఒక వ్యక్తిని మరో వ్యక్తి హత్య చెయ్యటానికి కత్తితో పొడిచాడనుకోండి, అతను ఇంకా చనిపోకముందే మరో వ్యక్తి ఆ సంగతి తెలిసో తెలియకో మరో ఆయుధంతో కానీ లేక అదే ఆయుధంతో కానీ మరోసారి దాడి చేసినట్లయితే, ఆ చివరి సారి చేసిందే హత్య అవుతుంది, మొదటి సారిది హత్య ప్రయత్నమవుతుంది.  అలాగే అప్పటికే చనిపోయిన మనిషిని మూడవ వ్యక్తి వచ్చి మరోసారి హత్య చేసే ఉద్దేశ్యంతోనే ప్రహారం చేసినా అది హత్య అవదు.  ఎందుకంటే అప్పటికే ఆ మనిషి చనిపోయాడు కనుక.  

ఇది మానవ హత్యానేరంలో జరిగేది.  కానీ మనిషి సెంటిమెంట్ కి సమాజంలో ఇచ్చే గౌరవ మర్యాదలకు, ముఖ్యంగా భారత దేశం శీలానికి ఇచ్చే ప్రాధన్యతను దృష్టిలో పెట్టుకుంటే శిక్ష అందరికీ పడాల్సిందే అంటారు మేధావివర్గంవారు.

-శ్రీజ