Posted: 02/02/2013 12:56 PM IST

అవినీతిని అంతమొందించడానికి లోక్‌పాల్‌ను ఒక శక్తివంతమైన ఆయుధంగా చేస్తామనే విషయంలో ప్రభుత్వం తమని మోసగించిందని సామాజిక కార్యకర్త అన్నా హజారే విమర్శించారు. ప్రతిపాదిత బిల్లు అసమర్ధంగా వుందని ఆయన వ్యాఖ్యానించారు. ఎన్నికల కమిషన్‌తో సమానంగా సిబిఐ, సివిసిలను స్వతంత్ర సంస్థలుగా చేయాలని డిమాండ్‌ చేశారు. అవసరమనుకుంటే సమర్ధవంతమైన లోక్‌పాల్‌ కోసం మళ్ళీ రాంలీలా మైదాన్‌కు వెళతానని, ఆందోళన చేపడతానని ఆయన చెప్పారు. ''ప్రభుత్వం మమ్మల్ని, ఈ దేశ ప్రజలను పదే పదే మోసగిస్తోంది. అవసరమైతే, పటిష్టమైన, సమర్ధవంతమైన లోక్‌పాల్‌ బిల్లు కోసం రాంలీలా మైదాన్‌కు వెళతా''నని హజారే చెప్పారు. కేంద్ర కేబినెట్‌ ఆమోదించిన లోక్‌పాల్‌ బిల్లును ఆయన తిరస్కరించారు. సిబిఐ, సివిసిలపై ప్రభుత్వం తన అదుపు గనక వదులుకోకపోతే అవినీతిపై పోరాటం అంత పటిష్టంగా అమలు కాదని అన్నారు. కేవలం ప్రభుత్వానికి వీటిపై నియంత్రణ వుండడం వల్లనే అవినీతి పెచ్చరిల్లుతోందని అన్నారు. అందువల్ల ఈ రెండు సంస్థలను తక్షణమే స్వయంప్రతిపత్తి సంస్థలుగా తయారుచేయాలని కోరారు. ప్రధాని మన్మోహన్‌ సింగ్‌ తనకు ఇచ్చిన నిర్దిష్ట డిమాండ్లపై మాటను నిలబెట్టుకోవడంలో విఫలమయ్యారన్నారు.

ప్రభుత్వ మోసాన్ని ప్రజలకు తెలియచేసేందుకు దేశవ్యాప్తంగా త్వరలో తాను పర్యటిస్తానన్నారు. వచ్చే సంవత్సరం ఎన్నికల్లో మంచి వారిని ఎన్నుకునేందుకు కృషి చేస్తానన్నారు. లోక్‌పాల్‌ బిల్లుకు సవరణలను కేంద్ర కేబినెట్‌ ఆమోదించిన నేపథ్యంలో వాటిని సామాజిక కార్యకర్త కిరణ్‌బేడీ స్వాగతించగా, అందుకు విరుద్ధంగా అన్నా హజారే ప్రభుత్వాన్ని దుయ్యబట్టారు. రాష్ట్రాల్లో లోకాయుక్తల ఏర్పాటు గురించి నిబంధన ఆ బిల్లులో లేదన్నారు. పైగా దిగువ స్థాయి అధికార యంత్రాంగాన్ని మినహాయించారన్నారు. త్వరలో పార్లమెంట్‌లో లోక్‌పాల్‌ బిల్లును ఆమోదిస్తామని కాంగ్రెస్‌ చీఫ్‌ సోనియా గాంధీ హామీ ఇస్తూ రాసిన లేఖ తనకు అందిందని చెప్పారు. దానిపై స్పందిస్తూ ఈ ప్రభుత్వం మంచి చట్టాలను చేయడంలో విఫలమైందన్నారు.