Posted: 01/24/2013 06:23 PM IST

తెలంగాణ సమస్య పై కేంద్ర మంత్రి  గులాం నబీ ఆజాద్ చేసిన వ్యాఖ్యలపై తెలంగాణ కాంగ్రెస్ నాయకులు, టీఆర్ఎస్ పార్టీ నాయకులు తీవ్రస్థాయిలో మండిపడుతున్నారు.  మంత్రి జానా రెడ్డి మాత్రం  అందుకు విరుద్దుంగా మాట్లాడుతున్నారు. కాంగ్రెస్ అధిష్టానానికి  మరికొంత సమయం ఇద్దామని మంత్రి జానా రెడ్డి  తెలంగాణ కాంగ్రెస్ నాయకులకు సూచించారు. మూడురోజుల నుంచి ఢిల్లీలో ఉండి అధిష్ఠానం పెద్దలను కలుస్తున్నామని మంత్రి జానా రెడ్డి తెలిపారు.  అధిష్టానం ఎవరి ఒత్తిళ్లకు  లొంగదని  తేల్చిచెప్పారు.   ప్రజల మనోభీష్టాన్ని తాము నెరవేర్చలేనప్పుడు  ప్రజల పక్షాన నిలబడతామని ఆయన చెప్పారు. కేంద్రం తెలంగాణ సమస్యను త్వరలో పరిష్కరిస్తుందని తాము గమనించామని, సమస్య పరిష్కారం కోసం కేంద్రానికి మరికొంత సమయమిచ్చి సహకరిద్దామని ఆయన కోరారు. ఆ పరిష్కార మార్గం దొరికేంతవరకు సంయమనం పాటించమని అధిష్టానం కోరుతోందన్నారు. ప్రజలు సంయమనం పాటించాలని జానారెడ్డి విజ్ఞప్తి చేశారు. మూడు ప్రాంతాల వారు ఆవేశకావేశకాలకు లోనవకూడదని, ఎన్నో ఏళ్ల తరబడి నలుగుతున్న తెలంగాణ సమస్య పరిష్కారానికి సీమాంధ్ర నేతలు సహకరించాలని సూచించారు. ఇప్పటికే రాష్ట్రంలో అభివృద్ధి కుంటుపడిందని, ఘర్షణ వాతావరణం సృష్టించడం మంచికాదని జానారెడ్డి తెలిపారు. ప్రత్యేక తెలంగాణ రాష్ట్రం వచ్చి తీరుతుందనే నమ్మకం ఉందని, అవసరమైనప్పుడు పదవులను లెక్కచేయమని, ప్రజలపక్షాన ఉండి పోరాడుతామని ఆయన తెలిపారు. ఢిల్లీ నుంచి తిరిగి వెలితే అవమానాలు ఎదురవుతాయని తమకు తెలుసని, సమస్య సానుకూలంగా పరిష్కరించడానికి ఇబ్బందులు తప్పవని మంత్రి జానారెడ్డి పేర్కొన్నారు.