Posted: 01/16/2013 01:11 PM IST

తెలంగాణ పై స్పష్టమైన వైఖరి తెలుసుకునేందుకు పొయిన నెల 28న ఏర్పాటు చేసిన అఖిల పక్ష భేటీలో కేంద్రం తెలంగాణ పై నెల రోజుల్లో స్పష్టమైన వైఖరిని తెలియజేస్తామని చెప్పిన విషయం తెలిసిందే. అన్ని పార్టీల అభిప్రాయాల్ని తెలుసుకున్న కేంద్రం ఈ నెల 28వ ఏదో ఒక నిర్ణయం చెప్పేందుకు సిద్ధం అవుతుందన్న వార్తలు వస్తున్నాయి. ఈ గడువు దగ్గర పడుతున్నా కొద్ది రాష్ట్ర నేతలలో టెన్షన్ పెరుగుతుంది. దీంతో వారు ఢిల్లీకి క్యూ కడుతున్నారు. ఇప్పటికే తెలంగాణ కాంగ్రెసు నేతలు చాలా మంది ఢిల్లీలో మకాం వేసి తెలంగాణ పై స్పష్టమైన ప్రకటన ఇచ్చేలా ఒప్పించే పనిలో ఉన్నారు. ఇక ఇప్పుడు సీమాంధ్ర నేతలు కూడా ఢిల్లీకి చేరుకుంటున్నారు. మంత్రులు టిజి వెంకటేష్, విశ్వరూప్, కాసు వెంకటకృష్ణా రెడ్డి, దాదాపు ఓ పది మంది శానససభ్యులు మంగళవారం ఢిల్లీకి వెళ్లారు. ఇంకా మరింత మంది ఢిల్లీకి వెళ్లే అవకాశం ఉన్నట్లు చెబుతున్నారు. రాష్ట్రాన్ని సమైక్యంగా ఉంచాలని అధిష్టానాన్ని కోరేందుకు వారు ఢిల్లీ దారి పట్టారు.

ఇదిలావుంటే, ఈ నెల 17వ తేదీన సీమాంధ్ర నేతలు సదస్సు తలపెట్టారు.  మరోవైపు పిసిసి మాజీ అధ్యక్షుడు డి.శ్రీనివాస్ మంగళవారం ఢిల్లీలో సోనియాను కలిశారు. జైపూర్‌లో సమావేశంలో తెలంగాణపై చర్చించేలా ఆయన కీలక నోట్ సమర్పించినట్లు తెలిసింది. తెలంగాణకు పరిష్కారం చూపడంతోపాటు రాష్ట్రంలో బీసీలకు నాయకత్వం అప్పగించాలని ఆయన కోరినట్లు సమాచారం. సోనియాను కలిసి వచ్చిన తర్వాత తెలంగాణ పార్లమెంటు సభ్యులు డి. శ్రీనివాస్‌తో సమావేశమయ్యారు. మొత్తం మీద ఈనెల 28లోపు తెలంగాణపై ఏదో ఒక ప్రకటన రావడం ఖాయమనే భావన నేతలందరిలో కనిపిస్తోంది. దీన్ని బట్టి తెలంగాణపై అధిష్ఠానం ఒక నిర్ణయం తీసుకునే అవకాశం ఉందనే విషయం అర్థమవుతోందని అంటున్నారు.