Posted: 01/15/2013 05:53 PM IST

భారత సరిహద్దులో ఈనెల 8వ తేదీన పాకిస్థాన్ సైనికులు భారత జవాన్లను అతి కిరాతంగా హతమార్చిన విషయం తెలిసిందే. ఈ విషయం పై తీవ్రంగా స్పందించిన బీజేపీ పార్టీ సీనియర్ నేత, లోకసభ ప్రతిపక్ష నేత సుష్మా స్వరాజ్ తీవ్రంగా స్పందించారు. పాకిస్థాన్ సైనికులు ఇద్దరు బారత జవాన్లను నరికి అందులో హేమరాజ్ అనే సైనికుడి తలను తన వెంట తీసుకొని వెళ్లారు. హేమరాజ్ కుటుంబాన్ని పరామర్శించడానికి వచ్చిన సుష్మా మాట్లాడుతూ... హేమరాజ్ తలకు బదులు పది పాకిస్థాన్ సైనికుల తలలు కావాలని, హేమరాజ్ తలను పాకిస్తాన్ ఇవ్వకుంటే మనం తప్పకుండా అటు నుండి పది తలలు తీసుకు రావాలన్నారు. ఇలాంటి ఘటన తర్వాత కూడా కేంద్రం బుజ్జగింపు చర్యలు సరికావన్నారు. ఈ ఘటనపై కేంద్రం అంతే తీవ్రంగా స్పందించాలని సూచించారు. ఆమె పార్టీ నేతలు నితిన్ గడ్కరీ, రాజ్‌నాథ్ సింగ్‌తో కలిసి హేమరాజ్ కుటుంబాన్ని పరామర్శించారు.

పాక్ దుశ్చర్యల పట్ల మనం చేతులు ముడుచుకు కూర్చుంటే లాభం లేదన్నారు. కేంద్రం ప్రభుత్వం ఖచ్చితంగా స్పందించాలన్నారు. కేంద్రం కఠిన నిర్ణయాలు తీసుకోవాలని సూచించారు. హేమరాజ్ తలను తమకు అప్పగించాలని వారి కుటుంబ సభ్యులు నిరాహార దీక్షకు దిగారు. సుష్మా విమర్శల అనంతరం స్పందించిన ఉత్తరప్రదేశ్ ముఖ్యమంత్రి అఖిలేష్ యాదవ్ హేమరాజ్ కుటుంబాన్ని పరామర్శించి, దీక్ష విరమింపజేసి, ప్రభుత్వం తరుపున 20 లక్షల పరిహారాన్ని ప్రకటించారు. ఈ చర్యపై భారతీయులు ఆగ్రహం వ్యక్తం చేస్తున్నారు.