Posted: 01/07/2013 10:28 AM IST

భారతీయ సంస్కృతీ పరిరక్షకులమని చెప్పు కునే రాష్ట్రీయ స్వయం సేవక్‌ సంఘ్ అదే సంస్కృతి 'నూరేళ్ల పంట' అంటూ ఘోషించే వివాహ ప్రక్రియకు వక్రభాష్యం చెబుతోంది. వివాహం అంటే కేవలం దంపతుల మధ్య కుదిరే 'ఒప్పందం' మాత్రమేనని, ఈ ఒప్పందం ముగిసే వారకూ వారు కలిసి వుంటారని ఆరెస్సెస్‌ అధినేత మోహన్‌ భగవత్‌ వ్యాఖ్యా నించారు. రేప్‌లు భారత దేశంలో జరగవని, ఇండియాలో మాత్రమే జరుగుతాయంటూ వ్యాఖ్యలు చేయడం ద్వారా వివాదానికి కారణమైన కొద్ది రోజులకే ఆర్‌ఎస్‌ఎస్ చీఫ్ మోహన్ భగవత్ మరోసారి అలాంటి వివాదానికి తెరదీసారు. వివాహం అనేది ఒక సామాజిక కట్టుబాటు అని, ఈ సిద్ధాంతం ప్రకారం మహిళలు ఇంటి పనులకే పరిమితం కావాలంటూ ఆయన చేసిన వ్యాఖ్యలు మరోసారి వివాదానికి కారణమైనాయి. ‘భార్య భర్తలు సామాజిక కట్టుబాటు సిద్ధాంతానికి కట్టుబడి ఉండాలి. ‘నీవు (మహిళ) ఇంటిపనులు చూస్తూ నన్ను సంతృప్తి పరిస్తే నేను (పురుషుడు) నీ అవసరాలు చూస్తూ నీకు రక్షణగా ఉంటాను’ అని ఆ కట్టుబాటు చెప్తోంది. అంతేకాదు ఆమె తన విధులను ఎలాంటి భంగం వాటిల్లకుండా నెరవేర్చినంతకాలం అతను ఆమెకు అండగా ఉంటాడు. ఒక వేళ ఆమె ఆ కాంట్రాక్ట్‌ను గౌరవించకపోతే అతను ఆమెను వదిలి పెట్టవచ్చు.

అలాగే భర్త కాంట్రాక్ట్‌ను గౌరవించకపోతే భార్య సైతం అతడిని వదిలిపెట్టి వేరే బంధాన్ని ఎంచుకోవచ్చు’ అని మోహన్ భగవత్ మధ్యప్రదేశ్‌లోని ఇండోర్‌లో ఆర్‌ఎస్‌ఎస్ కార్యకర్తలనుద్దేశించి అన్నారు. బిజెపి యువజన విభాగం అధినేత అనురాగ్‌ ఠాకూర్‌ మరింత ఆజ్యం పోస్తూ కాంగ్రెస్‌ అధినేత్రి సోనియాను 'దెయ్యం' అంటూ ఫేస్‌బుక్‌లో వ్యాఖ్యానించారు. భారత్‌లో ఉన్నత స్థాయి నేతలందరూ ఒక విదేశీ 'దెయ్యం' చేతిలో కీలు బొమ్మలుగా మారారని ఆయన పరోక్షంగా సోనియాపై విమర్శలు గుప్పించారు.