Posted: 12/23/2012 11:16 AM IST

ఢిల్లీలో వైద్య విద్యార్థిని పై జరిగిన అత్యాచార సంఘటన దేశాన్నే కాకుండా రాజకీయ నేతల్ని కదిలించింది. ఇక పై అత్యాచారాలకు పాల్పడే కామాంధులకు ఉరి శిక్షే పడేవిధంగా కఠినంగా చట్టసవరణ చేస్తామని కేంద్ర హోంమంత్రి సుశీల్ కుమార్ షిండే సూచన ప్రాయంగా వెల్లడించారు. శాన్ని దిగ్భ్రాంతికి గురి చేసిన ఢిల్లీ సామూహిక అత్యాచారోదంతంపై విచారణకు, మహిళకు మరింత భద్రత కల్పించేందుకు తీసుకోవాల్సిన చర్యలను సూచించేందుకు జ్యుడీషియల్ కమిషన్‌ను నియమిస్తున్నట్టు ప్రకటించారు. మహిళలపై నేరాల నియంత్రణకు చట్టాలను మరింతగా పటిష్టపరుస్తాం. అత్యాచారాలు, లైంగిక దాడుల్లాంటి అత్యంత అరుదైన కేసుల్లో శిక్షను గరిష్టంగా పెంచేలా నేర చట్టాలకు సవరణ చేస్తాం. నాలుగంచెల విధానం ద్వారా ఢిల్లీ సహా దేశంలోని అన్ని నగరాల్లో మహిళలకు రక్షణ, భద్రత మెరుగుపరుస్తాం అని ఆయన చెప్పారు.

హస్తినలో జనాగ్రహం పెల్లుబికిన నేపథ్యంలో ప్రధాని మన్మోహన్‌సింగ్‌తో శనివారం షిండే గంట పాటు భేటీ అయ్యారు. నిరసనలపై ప్రధానికి షిండే నివేదిక అందచేశారు. ఇక ఢిల్లీలో అత్యాచార బాధితురాలికి మద్దతుగా నిరసన తెలియజేస్తున్న వారి పై భాష్పవాయువు ప్రయోగించడం పై షిండే విచారం వ్యక్తం చేశారు.