Posted: 12/17/2012 09:01 AM IST

ఆధార్ కార్డ్... ఇది లేక పోతే ఇక పై మీ పనులు ముందుకు సాగవు. ఇక రానున్న కాలంలో ఆధార్ తోనే జీవితానికి ఆధారం. ఒక వేళ మీకు ఆధార్ కార్డు లేక పోతే వెంటనే తీసుకోవడానికి ప్రయత్నించండి. ఇక పై ఆధార్ కార్డు ఉంటేనే
ప్రభుత్వం రావాల్సిన రాయితీలు, పించన్లు, బ్యాంకు రుణాలు, గ్యాస్ కనెన్షన్, స్వయం ఉపాధి పథకాల కింద రుణం పొందాలన్నా, ప్రభుత్వ ఆస్పత్రుల్లో వైద్యం చేయించుకోవాలన్నా.. ఉద్యోగాల కోసం దరఖాస్తులు సమర్పించాలన్నా.. ప్రభుత్వ, ప్రైవేట్‌తో ముడిపడి ఉన్న ఎటువంటి ప్రయోజనాన్ని పొందాలన్నా ఇకపై ఆధార్ కార్డులను తప్పనిసరి చేయనున్నారు. గ్యాస్ సిలిండర్, పాస్‌పోర్ట్ వంటి దర ఖాస్తుల సమర్పణకు ఇకపై ఆధార్ ప్రామాణికం కానుంది. చివరికి, సెల్‌ఫోన్ కనెక్షన్ తీసుకోవాలన్నా ఆధార్ కార్డును సమర్పించాల్సిందే !  ఇలా ఒకటేమిటి ఏది కావాలన్నా మీరు ఆధార్ కార్డు తప్పని చేసే పనిలో పడింది యంత్రాంగం. ఒక వేళ మీకు ఆధార్ కార్డు లేకుండా పైన చెప్పినవి మన చేతికి రావు. ఇప్పటికే మీరు ఆధార్ కార్డును తీసుకుంటే సరేసరి. లేకపోతే, మీరు ఇష్టపడినా, ఇష్టపడకపోయినా, మీకు ఎన్ని అభ్యంతరాలు ఉన్నా ఆధార్ కార్డును తీసుకోవాల్సిందే.

ఎందుకంటే కేంద్ర ప్రభుత్వం ప్రతి పథకాన్నీ, ప్రతి రాయితీనీ ఆధార్‌తో అనుసంధానించాలని భావిస్తోంది. ఈ మేరకు ప్రజా ఆర్థిక మరియు విధాన జాతీయ సంస్థ (ఎన్ఐపీఎఫ్‌పీ) ఆధార్ కార్డు ప్రయోజనాలపై ఒక విశ్లేషణ చేసింది. ఈ నివేదికను ప్రణాళికా సంఘం విడుదల చేసింది. ప్రజా పంపిణీ వ్యవస్థ (పీడీఎస్), గ్రామీణ ఉపాధి హామీ పథకం, వంటగ్యాస్, విద్య, ఇందిరా ఆవాస్ యోజన (ఐఏవై), ఇంటిగ్రేటెడ్ చైల్డ్ డెవలప్‌మెంట్ సెంటర్లు (ఐసీడీఎస్) తదితర కేంద్ర పథకాలు, సబ్సిడీలను ఆధార్‌తో అనుసంధానించాలని ఆ నివేదికలో పేర్కొంది. ప్రస్తుతం 2 శాతంగా ఉన్న ఆధార్ సహిత ప్రభుత్వ పథకాలు, రాయితీలను 2018-19 నాటికి వంద శాతానికి తీసుకెళ్లాలని సూచించింది. తద్వారా ఈ పథకాలు, రాయితీల్లో ఉన్న లీకేజీలను అరికట్టాలని అభిప్రాయపడింది. కేంద్రం నగదు బదిలీ ప్రవేశపెట్టిన 34 పథకాల్లో 27 పథకాలు ఈ నివేదికలో పేర్కొన్నవే కావటం గమనార్హం .