Posted: 12/11/2012 11:48 AM IST

రానున్న లోక్‌సభ ఎన్నికల్లో యూపీఏ ప్రచారానికి రాహుల్‌గాంధీ సారథ్యం వహిస్తారని, అతి త్వరలోనే పార్టీలో కీలక పదవి చేపడతారని కాంగ్రెస్ ప్రకటించింది. ఈ ప్రకటన ద్వారా రాహుల్ గాంధీయే ప్రధాని అభ్యర్థి అన్న స్పష్టమైన సంకేతాలు అందించింది. లోక్‌సభకు 2014లో జరిగే ఎన్నికల్లో యూపీఏ కూటమికి మెజారిటీ లభిస్తే ఏఐసిసి ప్రధాన కార్యదర్శి రాహుల్‌గాంధీ ప్రధాన మంత్రి పదవి చేపడతారని కాంగ్రెస్ అధికార ప్రతినిధి పిసి చాకో పరోక్షంగా సూచించారు. రాహుల్‌గాంధీ నాయకత్వంలో కాంగ్రెస్, దాని మిత్రపక్షాలు లోక్‌సభ ఎన్నికలను ఎదుర్కొంటాయని ప్రకటించారు. రాహుల్‌గాంధీ నాయకత్వంలో కాంగ్రెస్ ఎన్నికల ప్రచారం కొనసాగుతుందని అన్నారు. ఏఐసిసి పునర్వ్యవస్థీకరణలో రాహుల్‌గాంధీ అత్యంత కీలక బాధ్యతలు చేపట్టనున్నారని చాకో వెల్లడించారు. ప్రస్తుతం ఏఐసిసి ప్రధాన కార్యదర్శి బాధ్యతలు నిర్వహిస్తున్న రాహుల్ గాంధీ, పార్టీ కార్యనిర్వాహక అధ్యక్షుడిగా నియమితులవుతారా? అని ఒక విలేకరి వేసిన ప్రశ్నకు ‘వేచి చూడండి. మీకే తెలుస్తుంది’ అంటూ చాకో స్పష్టమైన సమాధానం చెప్పకుండా దాటవేశారు. లోక్‌సభ ఎన్నికల సమయంలో రాహుల్‌గాంధీని యూపీఏ ప్రధానమంత్రి అభ్యర్థిగా ప్రకటిస్తారా? అన్న ప్రశ్నకు ఎన్నికల సమయంలో ఈ ప్రశ్నకు సమాధానం లభిస్తుందని చెబుతూనే, దీనిపై పార్టీ హైకమాండ్ తుది నిర్ణయం తీసుకుంటుందని చాకో వివరించారు. చాకో మరో ప్రశ్నకు బదులిస్తూ సోనియాగాంధీ కాంగ్రెస్‌కు సుప్రీం అన్నారు.

లోక్‌సభ ఎన్నికల్లో రాహుల్‌గాంధీని యూపీఏ నాయకుడుగా చూపిస్తే, ప్రధాని మన్మోహన్ సింగ్ ఏమవుతారని అడుగగా మన్మోహన్ సింగ్ 2014 వరకూ ప్రధాన మంత్రిగా కొనసాగుతారని చాకో స్పష్టం చేశారు. రాహుల్‌గాంధీ కాంగ్రెస్‌లో కీలక బాధ్యతలు చేపడితే పార్టీ అధినేత్రి సోనియాగాంధీ ఏమవుతారన్న ప్రశ్నకు చాకో బదులిస్తూ ఆమె తమ పార్టీ సుప్రీం అన్నారు. రాహుల్ గాంధీ పార్టీలో కీలక బాధ్యతలు చేపట్టేందుకు మొదట నిరాకరించినా మెజారిటీ నాయకులు, కార్యకర్తలు డిమాండ్ చేయటంతో ఆయన అంగీకరించక తప్పలేదని చాకో వెల్లడించారు.