Posted: 12/05/2012 04:55 PM IST

ఆ ఇద్దరు దూరంగా ఉంటే మాటల యుద్దం చేసుకుంటారు. ఒకరి ఒకరు నిప్పుల వర్షం కురిపించుకుంటారు. ఆ ఇద్దరి మద్య పచ్చగడ్డి వేస్తే భగ్గున మంటలు మండుతాయని అందరికి తెలుసు. ఈ ఇద్దరి మాటల యుద్దం కోసమే మీడియా వారు ఎదురుచూస్తుంటారు. అలాంటి వ్యక్తులు  తెలంగాణ కోసం పోరాటం చేస్తున్న రాములమ్మ (ఎంపీ విజయశాంతి) సాక్షిగా, శాంతికి నిదర్శనం అయిన కపోతం సాక్షిగా ఇద్దరు కలుసుకోని కరచాలనం తీసుకున్నారు.  దూరంగా ఉంటే తిట్ల యుద్దం, దగ్గరైతే ప్రేమతో ఐ లవ్ యు అనే మాటలు చెప్పుకుంటారు. ఒక తెలంగాణ కోసం పోరాటం చేసే రాజకీయ నాయకుడు, మరొకరు సమైక్యాంద్రవాది. ఇప్పటికే మీకు తెలిసిపోయి ఉండాలి. ఒకరు టీఆర్ఎస్ పార్టీ అధినేత కేసిఆర్, మరొకరు కాంగ్రెస్ ఎంపీ లగడపాటి రాజగోపాల్.  ఈ ఇద్దరి మద్య అరుదైన సంఘటన చోటుచేసుకుంది.  ఈ ఇద్దరు పార్లమెంట్  ఆవరణలో  ఒకరికొకరు ఎదురై  ఇలా కరచాలనం చేసుకున్నారు. మద్యలో విజయశాంతి నవ్వులు, ఆ పక్కనే  ప్రేమకి ప్రతిరూపం అయిన పావురం, ఈ ఫోటో రాజకీయ వర్గాల్లో హాట్ టాపిక్ అయ్యింది. 

ఈ అరుదైన ఘటన  ఫొటోగ్రాఫర్  గొప్పతనమో, లేక ప్రేమ అన్ని సమస్యలకు పరిష్కారం చూపిందని అర్థమో , లేక రాజకీయ నాయకులకు  మనసులో ఒకటి, బయట చేసేది ఇంకొకటి అన్న నైజాన్ని ఈ ఇద్దరి కలియక  బయటపెడ్తోందోగానీ.. ప్రాంతాలకతీతంగా  రాజకీయ నాయకులు కలిసిమెలిసి ఉంటే మాత్రం  ప్రజల మద్య వైషమ్యాలు కొంతమేర తగ్గే అవకాశాలున్నాయి.  అంతకముందే కేసిఆర్ అక్కడే ఉన్నప్పటికీ  అటుగా వచ్చిన ఎంపీ  అంజన్ కుమార్ కేసిఆర్ ను పలకరించకుండానే లోపలికి వెళ్లిపోయారు.