Posted: 11/17/2012 07:12 PM IST

ఇప్పుడు మన రాష్ట్రంపై సీరియస్‌గా దృష్టి సారిస్తున్నారు. అన్ని సమస్యల పరిష్కార బాధ్యతను దిగ్విజయ్‌కి అప్పగించాలని నిర్ణయించినట్లు తెలుస్తోంది. త్వరలోనే డిగ్గీ రాజా హైదరాబాద్‌ రానున్నారు.రాష్ట్రంలో కాంగ్రెస్‌ పరిస్థితులపై రాహుల్ పూర్తిస్థాయిలో దృష్టి పెట్టారు. కేంద్రంలో హ్యాట్రిక్ సాధించేందుకు ఏపీ కీలకమని భావించిన ఆయన.. సీట్లు చేజారకుండా చర్యలకు దిగారు. తన నేతృత్వంలోని సమన్వయ కమిటీలో సభ్యుడుగా ఉన్న దిగ్విజయ్ సింగ్‌కు రాష్ట్ర పార్టీని చక్కదిద్దే బాధ్యతను అప్పజెప్పినట్టు సమాచారం. ఈ మధ్య రాష్ట్రానికి సంబంధించి ఏ ఇష్యూపై చర్చించినా... ఆజాద్, వాయలార్‌తో పాటు దిగ్విజయ్ కూడా ఉంటున్నారు. కొద్దిరోజుల కిందట వార్ రూమ్‌లో జరిపిన చర్చలకూ హాజరయ్యారు. త్వరలోనే ఛార్జ్‌ తీసుకుని రాష్ట్రానికి రానున్నట్లు సమాచారం.అయితే ఏఐసిసి పునర్‌వ్యవస్థీకరణలో భాగంగా రాష్ట్ర బాధ్యతల నుంచి ఆజాద్‌ను మారుస్తారనే ప్రచారం ఉంది. ఆయన స్థానంలో ఎవరిని ఇంఛార్జ్‌గా నియమిస్తారనే చర్చ మొదలైంది కూడా. ముకుల్ వాస్నిక్, అంబికాసోనీ లతో పాటు దిగ్విజయ్ పేర్లు ప్రచారంలోకొచ్చాయి. అలాగని డిగ్గీరాజాని పూర్తిస్థాయి ఇంఛార్జ్‌గా నియమించే అవకాశం లేకపోవచ్చు. రాహుల్ టీంలో సభ్యుడిగా, ఉత్తరాదిలోని కీలక రాష్ట్రాలపైనా ఆయన దృష్టి సారించాల్సి ఉంది.కాబట్టి పరిస్థితులను చక్కదిద్ది పార్టీని గాడిన పెట్టే వరకు మాత్రమే ఆయన పరిమితం కావచ్చని తెలుస్తోంది. తెలంగాణ సమస్యపైనా రాహుల్ దిగ్విజయ్‌కి దిశానిర్దేశం చేసినట్లు సమాచారం. వైఎస్‌ ముఖ్యమంత్రిగా ఉన్నప్పుడు దిగ్విజయ్‌ రాష్ట్ర వ్యవహారాల ఇంచార్జీగా పనిచేశారు. అన్ని ప్రాంతాల నాయకులతో మంచి సంబంధాలున్నాయి. ప్రస్తుతం గ్రూపులుగా ఉన్న నేతలెవరూ డిగ్గీరాజా మాట మీరరనే నమ్మకం హైకమాండ్‌కు ఉంది. అందుకే దిగ్విజయ్ ఈ ప్రాబ్లమ్స్ పరిష్కారానికి సరైన వ్యక్తిగా రాహుల్ భావిస్తున్నారు. మరి, ఆయన రాకతో పార్టీ పరిస్థితి మెరుగుపడొచ్చని రాష్ట్ర నాయకులు కూడా చెప్తున్నారు. మరి, ఆయన ఎలాంటి ఫార్ములాను ప్రయోగిస్తారో చూడాలి.