Posted: 08/11/2012 04:34 PM IST

ఒకవైపు కరడుగట్టిన హిందూత్వవాది.. సత్పరిపాలనతో దేశవ్యాప్తంగా ప్రశంసలు అందుకుంటున్న బీజేపీ నేత, గుజరాత్ ముఖ్యమంత్రి నరేంద్రమోడి. ఇంకోవైపు లౌకికత్వానికి చిహ్నం.. దేశ ప్రధానిగా మోడీ అభ్యర్థిత్వాన్ని తీవ్రంగా వ్యతిరేకిస్తున్న జేడీయూ నేత, బీహార్ ముఖ్యమంత్రి నితీశ్‌కుమార్. సహజంగా వీరిద్దరిలో ఆర్ఎస్ఎస్ మద్దతు నిస్సందేహంగా.. మోడికే ఉంటుందని అందరూ భావిస్తారు. కానీ, ఆర్ఎస్ఎస్ ఓటు మాత్రం నితీశ్‌కే పడింది. బీహార్ అభివృద్ధి నమూనా గుజరాత్ కంటే ఉత్తమమైనదని, ఆర్ఎస్ఎస్ చీఫ్ మోహన్ భగవత్ సర్టిఫికేట్ ఇచ్చేశారు. ఉత్తమ పాలన విషయంలో రాష్ట్రాలకు రేటింగ్ ఇస్తూ.. ఆయనీ విషయాన్ని చెప్పారు.

ప్రజాభిప్రాయం ప్రకారం.. ప్రభావవంతమైన పాలనలో గుజరాత్ కంటే బీహారే ముందంజలో ఉందని భగవత్ అన్నారు. "అభివృద్ధి పనుల్లో గుజరాత్ నమూనాను, మోడీ పనితీరును ప్రజలు ప్రశంసిస్తుంటారు. కానీ, ఈ విషయంలో నితీశ్ మోడీని సవాల్ చేశారు. బీహార్‌లో అభివృద్ధికి అవకాశాలు కష్టతరంగా ఉన్నప్పటికీ నితీశ్ సమర్థవంతంగా తన పాత్రను నిర్వర్తించారు'' అని భగవత్ వివరించారు. బీహార్ మోడల్ గుజరాత్ మోడల్ కంటే ఉత్తమం అని మరోసారి పునరుద్ఘాటించారు. ఇప్పటికే మోడీ ప్రధాని అభ్యర్థిత్వంపై సొంత పార్టీ నేతల నుంచే వ్యతిరేకత వ్యక్తమవుతోంది. నితీశ్ కూడా సమయం చిక్కినప్పుడల్లా మోడీపై లౌకిక వాది కాదంటూ విరుచుకుపడుతున్నారు.