Posted: 08/07/2012 11:00 AM IST

సాక్షి టివిలో  తెలుగుదేశం పార్టీ అధినేత  పై అనేక అభియోగాలు  మోపి  రచ్చ రచ్చ చేసిన కోలా కృష్ణమోహన్‌   పోలీసులకు చిక్కెడు. హైదరాబాద్‌లో అరెస్టయిన యూరో లాటరీతోపాటు పలు చీటింగ్ కేసుల్లో నిందితుడు కోలా కృష్ణమోహన్‌ను విజయవాడ పోలీసులు సోమవారం కోర్టుకు హాజరుపర్చారు. 8వ ఫాస్టు ట్రాక్‌కోర్టు న్యాయమూర్తి జస్టిస్ జె.శ్రీలక్ష్మి ఆయనకు రిమాండ్ విధించారు. తిరిగి 8వ తేదీన కోర్టులో హాజరుపర్చాల్సిందిగా ఆదేశించారు. దీంతో కోలాను పోలీసులు జిల్లా జైలుకు తరలించారు. పటమట, గవర్నరుపేట తదితర ప్రాంతాల్లో బ్యాంకులకు చెల్లనిచెక్కులు ఇచ్చి కోలా కృష్ణమోహన్ టోకరా ఇచ్చారు. ఈ కేసుల్లో ఆయనకు కింది కోర్టు రెండేళ్ల జైలుశిక్ష విధించింది. దీనిపై కోలా చేసుకున్న అప్పీల్ 8వ ఫాస్టుట్రాక్ కోర్టులో పెండింగ్‌లో ఉంది.

అయితే 2009 నుంచి కోర్టు వాయిదాలకు హాజరుకాకుండా కోలా తప్పించుకొని తిరుగుతున్నాడు. కాగా కొద్దిరోజుల క్రితం అకస్మాత్తుగా ఓ టీవీ చానల్‌లో ప్రత్యక్షమై తెలుగుదేశం పార్టీ అధినేత చంద్రబాబుకు భారీ మొత్తంలో డబ్బు ఇచ్చానంటూ ప్రకటన చేశాడు. దీంతో అప్రమత్తమైన పోలీసులు ఎట్టకేలకు కోలా కృష్ణమోహన్‌ను హైదరాబాద్‌లో ఆదివారం అదుపులోకి తీసుకొన్నారు. విజయవాడ కోర్టులో హాజరుపర్చగా జడ్జి రిమాండ్ విధించారు. విలేకరుల కంటపడనీయకుండా పోలీసులు.. కోలాకు ముసుగుకప్పి కోర్టుకు తీసుకొచ్చారు. ఆటోలో పలు రోడ్లలో తిప్పుతూ.. జిల్లా జైలుకు తరలించడం విశేషం.