Posted: 03/16/2012 10:32 AM IST

కేంద్ర ఆర్థిక మంత్రి ప్రణబ్‌ ముఖర్జీ భారతదేశ 81 ఆర్థిక బడ్జెట్‌ను మహాలక్ష్మికి ఇష్టమైన శుక్రవారం లోక్‌సభలో ప్రవేశపెట్టనున్నారు. ఇది ప్రణబ్‌ ప్రవేశపెడుతున్న 7వ బడ్జెట్‌. మురార్జీదేశాయ్ 10 సార్లు భారత బడ్జెట్‌ ప్రవేశపెట్టగా, రెండవ స్థానంలో 7 సార్లు బడ్జెట్‌ ప్రవేశపెట్టిన ప్రణబ్‌, చిదంబరం, యశ్వంత్‌ సిన్హా, వైబి చవాన్‌, సిడి దేశ్‌ముఖ్‌ ఉన్నారు.  భారతదేశ తొలి బడ్జెట్‌ను ఆర్‌కె షణ్ముఖమ్‌ శెట్టి ప్రవేశపెట్టారు. మన్మోహన్‌ కేవలం ఆరుసార్లే బడ్జెట్‌ రూపొందించారు. ఇదిలా ఉండగా, ప్రతి ఆర్థిక మంత్రి బడ్జెట్‌ ప్రవేశపెట్టబోయే ముందు పార్లమెంటు ముందర ఎర్రసూట్కేసు విలేఖర్లకు చూపడం అంతర్జాతీయ సంప్రదాయం. ఈ విధంగా మామిడి చిగురు రంగులోని సూట్కేసునే ఎందుకు వాడతారు అనేదానికి కూడా ఒక చరిత్రుంది. ఇది దొరల నుంచి దిగుమతి అయిన సంప్రదాయం. అయితే ఇది ఫ్రెంచి సంప్రదాయ సూట్కేసు అనేవారు లేకపోలేదు. ఆంగ్లేయులు మాత్రం ఒకే బ్రీఫ్‌కేసును వాడతారు. ఇది ఒక మంత్రి తరువాత మరో మంత్రికి ఆర్థికశాఖ వారసత్వ సంపదలా వెళుతుంది. 18వ శతాబ్దంనాటి సూట్కేసును ఇటీవల 2010లో వాడకం నుంచి తప్పించి మ్యూజియంకు తరలించారు. దీని వయసు 210 ఏళ్లు. బారో అండ్‌ గాలే సంస్థ 1800లో దీన్ని తయారు చేసి, అప్పటి మంత్రులకు ఇచ్చింది. ఈ బాక్స్‌తో విలియం ఇవార్ట్‌ గ్లాడ్‌స్టోన్‌  1853లో బడ్జెట్‌ ప్రవేశపెట్టడానికి 5 గంటల సమయం తీసుకున్నాడని చరిత్ర చెబుతోంది.