Posted: 03/08/2012 05:00 PM IST

వికీలీక్స్ తాజాగా అమెరికా నెత్తిన మరో బాంబు వేసింది. అగ్రరాజ్యాన్ని వణికించిన ఉగ్రనేత లాడెన్ ని అమెరికా చంపి సంబరాలు చేసుకుంది. తరువాత అతని డెడ్ బాడీని అరేబియా సముద్రంలో పడేశామని చెప్పి చేతులు దులుపుకుంది. అయితే తాజాగా వెల్లడైన కథనాల ప్రకారం లాడెన్ డెడ్ బాడీని అమెరికా ఇస్లామిక్ సాంప్రదాయల ప్రకారం ఖననం చేయకుండా దహనం చేసిందా ? అంటే అవుననే పచ్చి నిజాల్ని వికీలీక్స్ లీక్ చేసింది. ఈ వార్త ఇప్పుడు పెద్ద సంచలనాన్నే కలిగిస్తుంది.

అబోత్తాబాద్‌లోని ఓ భవనంలో దాగి ఉన్నలాడెన్‌ను గత ఏడాది మే2న అమెరికా బలగాలు మట్టుబెట్టిన విషయం తెలిసిందే. లాడెన్ మృతదేహాన్ని యూఎస్ఎస్ కార్ల్ విన్సన్ అనే నౌక ద్వారా తరలించామని... ఇస్లాం సంప్రదాయాల ప్రకారం సముద్రంలో ఖననం చేశామని అమెరికా రక్షణ వర్గాలు ప్రకటించాయి. దీనికి సంబంధించిన చిత్రాలను ఇప్పటిదాకా విడుదల చేయలేదు. ఓ హ్యాకింగ్ బృందం స్ట్రాట్‌ఫర్‌కు చెందిన ఈ-మెయిల్స్‌ను హ్యాక్ చేయడంతో.. అందులో లాడెన్ అంత్యక్రియలకు సంబంధించిన మెయిల్స్ బయటపడ్డాయి. స్ట్రాట్‌ఫర్ ఇంటెలిజెన్స్ విభాగం వైస్ ప్రెసిడెంట్ ఫ్రెడ్ బర్టన్ పంపిన మెయిల్‌లో... "లాడెన్‌ను సముద్రంలో ఖననం చేయలేదు. ఆయన మృతదేహాన్ని సీఐఏకు చెందిన విమానంలో అమెరికాలోని డెలావేర్‌కు తీసుకువచ్చారు. అక్కడి నుంచి మేరీల్యాండ్‌లో ఆర్మ్‌డ్ ఫోర్సెస్ ఇన్‌స్టిట్యూట్ ఆఫ్ పథాలజీకి తీసుకువెళ్లారు. బహుశా... లాడెన్ మృతదేహాన్ని గుర్తుతెలియని ప్రదేశంలో దహనం చేసి ఉండొచ్చు'' అని సందేహం వ్యక్తం చేశారు.  తమ సంస్థ నుంచి కొన్ని మెయిల్స్‌ను హ్యాకర్లు దొంగిలించారని స్ట్రాట్‌ఫర్ ఒక ప్రకటనలో పేర్కొంది. వాటిలో కొన్ని నిజమైనవని.. కొన్ని ఫోర్జరీ మెయిల్స్ కూడా ఉన్నాయని పేర్కొంది. మరి ఇందులో నిజమెంతో అబ్దమెంతో అమెరికాకే తెలియాలి.