తిరుమలలో కిడ్నాప్‌ కలకలం.. ఐదేళ్త బాలుడిని ఎత్తుకెళ్లిన మహిళ

Posted: 05/02/2022 03:31 PM IST

Five year old boy kidnapped at tirumala police intensifies search operations

ప్రముఖ పుణ్య క్షేత్రం తిరుమలలో కిడ్నాప్ కలకలం రేపుతోంది. గతంలోనూ ఇలాంటి ఘటనలు జరగ్గా.. సిసిటీవీ ఫూటేజీ అధారంగా చిన్నారి తీసుకువచ్చి బిడ్డ కోసం తల్లడిల్లిన తల్లిదండ్రులతో కలిపిన పోలీసులు.. తాజాగా జరిగిన ఘటనతో మరోమారు విస్మయానికి గురయ్యారు. తిరుపతికి చెందిన ఐదేళ్ల చిన్నారిని తిరుమల నుంచి గుర్తుతెలియని మహిళ అపహరించింది. ఈ కిడ్నాప్ ఘటన వివరాలల్లోకి వెళ్తే.. తిరుపతి సమీపంలోని దామినేడుకు చెందిన మహిళ తిరుమలలో వ్యాపారం చేసుకుంటూ జీవనం సాగిస్తుంది.

ఆమె కొడుకు ఐదేళ్ల గోవర్దన్ రాయల్ శ్రీవారి ఆలయం ఎదుట కూర్చొని ఉండగా ఆదివారం కిడ్నాప్‌కు గురయ్యాడు. అయితే బాలుడి ఆచూకీ లభించకపోవడంతో అతడి కుటుంబ సభ్యులు చుట్టుపక్కల గాలించారు. ఎలాంటి ఫలితం లేకపోవడంతో పోలీసులకు ఫిర్యాదు చేశారు. కాగా, సీసీటీవీ కెమెరాలను పరిశీలించిన పోలీసులు.. బాలుడిని ఓ మహిళ కిడ్నాప్ చేసినట్టుగా గుర్తించారు. గులాబీ కలర్‌ టాప్‌, క్రీమ్‌ కలర్‌ ప్యాంట్‌ ధరించి, గుండుతో మహిళ బాలుడ్ని తీసుకెళ్తున్న విజువల్స్ నిక్షిప్తమయ్యాయి. మరి, ఏం మాయ మాటలు చెప్పిందో ఏమో, బాలుడు కూడా ఆమెతో వెళ్తున్నట్లు దృశ్యాల్లో కనిపిస్తోంది.

బాలుడిని గుర్తుతెలియని మహిళ ఎత్తుకెళ్లడంతో తల్లి తల్లిడిల్లిపోతోంది. తన కొడుకును వెతికి పెట్టమని పోలీసులను వేడుకుంటోంది. ఇక రంగంలోకి దిగిన పోలీసులు బాలుడ్ని కిడ్నాప్ చేసిన మహిళ బాలుడితో పాటుగా ఆర్టీసీ బస్సులో తిరుపతికి చేరుకున్నట్టుగా గుర్తించారు. 03 జెడ్ 0300 నెంబర్ కలిగిన ఆర్టీసీ బస్సులో ఆమె తిరుపతి చేరుకుందని కనుగొన్నారు. అక్కడి నుంచి ఆమె ఎక్కడికి వెళ్లింది.. బస్సులోనే వెళ్లిందా.. లేక రైలులో వెళ్లిందా.? అని గుర్తించే పనిలో పడ్డారు. బాలుడి ఆచూకీ కోసం గాలింపు చేపట్టడానికి పోలీసులు ప్రత్యేక బృందాలను ఏర్పాటు చేశారు.