ప్రియురాలిని మోసం చేసిన కేసులో.. పాపులర్ నటుడు అరెస్ట్..

Posted: 04/25/2022 04:56 PM IST

సినీ ఇండస్ట్రీలో ఇప్పటికే హ్యాష్ ట్యాగ్ మీటూ ఓ వైపు కొనసాగుతూనే వుంది. పరిశ్రమపై మక్కువతో ఇక్కడికి వచ్చిన యువతులు లైంగిక వేధింపులకు గురయ్యారన్న ఘటనలు అనేకం. దీనికి తోడు అవకాశాల కోసం వాడుకున్నారంటూ కొనసాగుతున్న మీటూ మరోవైపు ఇలా పరిశ్రమ విలువల వలువలను తొలగిస్తున్నాయి. ఈ క్రమంలో ప్రముఖలు, యంగ్ హీరోలు.. తమ హీరోయిన్లతో, లేక లేడీ యాక్టర్లతో సాధ్యమైనంత దూరాన్ని పాటిస్తూ ఇలాంటి.. ఎలాంటి రోచ్చులో పడకుండా చూసుకుంటున్నారు. అయినా కొందరు మాత్రం కేటుగాళ్ల చేతిలో మోసపోతునే వున్నారు.

ఇటీవల కాలంలో హీరోయిన్లు తమకు జరిగిన అన్యాయాలపై బహిర్గత పరుస్తున్నారు. ఇన్నాళ్లు తమ గుండెలను పిండుతున్న ఈ నిజాలను తమలోనే వాటిని దాచుకుని.. మౌనబాధ అనుభవించిన నటీమణులు.. ఇక మీటూ పుణ్యమా అని.. ఒక్కొక్కరిగా వారికి జరిగిన అన్యాయాలను బయటపెడుతున్నారు. అలాగే లైంగిక ఆరోపణలు ఎదుర్కొన్న పెద్ద పెద్ద మేల్‌ సెలబ్రిటీలు కూడా లేకపోలేదు. తాజాగా ఒక టీవీ సీరియల్‌ నటుడు ప్రేమ, పెళ్లి పేరు చెప్పి శారీరకంగా లొంగదీసుకుని, మోసం చేశాడనే ఆరోపణలతో అరెస్ట్‌ అయ్యాడు. ఒడియా టీవీ సీరియల్లో నటించే ఎం సుమన్‌ కుమార్‌ను భువనేశ‍్వర్‌లోని పహాలా పోలీసులు ఆదివారం (ఏప్రిల్‌ 24) అరెస్ట్ చేశారు.

ప్రేమించి పెళ్లి చేసుకుంటానని నమ్మబలికి ఓ అమ్మాయిని మోసం చేశాడనే ఆరోపణలతో సుమన్‌ కుమార్‌పై కేసు నమోదు అయింది. నటుడు ఎం సుమన్‌ గత రెండేళ్లుగా అమ్మాయితో సంబంధం కొనసాగిస్తున్నట్లు బాధితురాలి తరఫు న్యాయవాది ప్రశాంత్‌ దే తెలిపారు. ఆమెను పెళ్లి చేసుకుంటానని హామీ ఇచ్చి అమ్మాయితో సాన్నిహిత్యం పెంచుకున్నాడన్నారు. తీరా పెళ్లి ప్రస్తావన తీసుకొస్తే ముఖం చాటేశాడని ఆయన పేర్కొన్నారు. బాధితురాలి ఫిర్యాదు ఆధారంగా సుమన్‌ను పోలీసులు అదుపులోకి తీసుకున్నారు. అతడిపై ఐపీసీ సెక్షన్‌ 376 (2) (ఎన్‌), 420, 294, 323, 504 సెక్షన్ల కింద కేసు నమోదు చేసి కోర్టుకు తరలించారు.