కుత్బుల్లాపూర్‌లో బాంబు పేలుడు.. భయంతో స్థానికుల పరుగులు..

Posted: 05/12/2021 04:21 PM IST

హైదరాబాదులోని కుత్బుల్లాపూర్ లో భారీ బాంబు పేలుడు సంభవించింది. ఈ భారీ విస్పోటనానికి భయభ్రాంతులైన స్థానికులు ఇళ్ల నుంచి ఒక్కసారిగా బయటకు పరుగులు తీశారు. అసలేం జరుగిందో తెలియకపోవడంతో భయాందోళనకు గురయ్యారు. ప్రాణలు అరచేతిలో పెట్టుకుని సురక్షిత ప్రాంతాల్లో తలదాచుకున్నారు. స్థానికుల నుంచి పిర్యాదులు అందుకున్న పోలీసులు ఘటనాస్థలానికి చేరుకుని పరిశీలించగా అది నిజంగా బాంబు పేలుడేనని నిర్థారించుకున్నారు. అక్కడే తచ్చాడుతున్న ఓ అనుమానాస్పద వ్యక్తి అదుపులోకి తీసుకుని విచారించారు.

ఓ వ్యక్తి చేతిలో ఉన్న బ్యాగ్‌లో ఈ పేలుడు సంభవించినట్లు తెలుస్తోంది. భారీ పేలుడు శబ్దానికి స్థానికులు ఉలిక్కిపడ్డారు. రెండు బ్యాగులు మోసుకుంటూ వచ్చిన ఓ వ్యక్తి పేట్ బషీరాబాద్ ప్రాంతంలోని జయరాంనగర్ చౌరస్తా వద్ద ఒకదానిని విసిరేశాడు. అది ఒక్కసారిగా భారీ శబ్దంతో పేలిపోయింది. అంతా నిర్మానుష్యంగా వున్న వేళ విస్పోటనం సంభవించడంతో పేలుడు శబ్దం దాదాపు కిలోమీటరు వరకు వినిపించింది. పేలుడు ధాటికి పక్కనే ఉన్న పూజాసామగ్రి దుకాణం అద్దాలు బద్దలయ్యాయి. నిత్యం ప్రశాంతంగా వుండే ప్రాంతంలో ఒక్కసారిగా పేలుడు సంభవించడంతో స్థానికులు ఉలిక్కపడ్డారు.

కాగా, నిందితుడిని అదుపులోకి తీసుకున్న పోలీసులు అతడి చేతిలో ఉన్న మరో బ్యాగును తెరిచేందుకు బాంబ్ స్క్వాడ్ ను రప్పించారు. అనంతరం దానిని తెరిచి చూడగా చెత్త ఉండడంతో ఊపిరి పీల్చుకున్నారు. నిందితుడిని విచారించగా తనకు ఆ బ్యాగ్ బాలానగర్ లో దొరికిందని చెప్పాడు. అయితే కుక్కలు తాను మోసుకువస్తున్న ఆ బ్యాగ్ ను చూసి మొరుగుతుండడంతో దానిని పడేసినట్టు చెప్పాడు. ఆ వ్యక్తి ఎవరు... బ్యాగ్‌లో పేలుడు పదార్థాలను ఎక్కడికి తీసుకెళ్తున్నాడన్నది తేలాల్సి ఉంది. అసలే జనం కరోనా భయంతో బిక్కుబిక్కుమంటూ గడుపుతున్న వేళ... ఈ పేలుడు ఘటన స్థానికులను మరింత భయాందోళనకు గురిచేసింది. కేసు నమోదు చేసుకున్న పోలీసులు దర్యాప్తు చేస్తున్నారు.