కరోనా వైరస్ అలర్ట్.. దేశంలో నాలుగో మరణం నమోదు

Posted: 03/19/2020 05:34 PM IST

Coronavirus updates india records fourth death confirmed cases close to 200

ప్రపంచవ్యాప్తంగా కళారా నృత్యం చేస్తున్న మహమ్మారి కరోనా వైరస్.. మన దేశంలోనూ పంజా విసురుతోంది. ఇప్పటికే 167 మందిపై తన ప్రభావాన్ని చాటిన ఈ మహమ్మారి.. ఇప్పటికే ధేశంలోని ముగ్గురు వృద్దులను బలితీసుకుంది. ఇక తాజాగా మరో మరణం కూడా నమోదైంది. ఈ మరణం పంజాబ్ రాష్ట్రంలో నమోదు కావడం కలకలం రేపుతోంది. పంజాబ్ లో 72 ఏళ్ల వృద్ధుడు కరోనాతో మరణించినట్టు ఆ రాష్ట్ర వైద్యాధికారులు నిర్ధారించారు. ఆయన ఇటీవలే ఇటలీ నుంచి వచ్చినట్టు తెలుసుకున్నారు.

కరోనావైరస్ సోకిన తొలి మరణం కర్ణాటకలో నమోదు కాగా, రెండవ మరణం న్యూఢిల్లీలో నమోదు అయ్యింది. ఇక మూడవ మరణం మహారాష్ట్రలో నమోదు కావడంతో కేంద్ర, రాష్ట్ర ప్రభుత్వాలు ప్రజలను అప్రమత్తం చేశాయి. దేశవ్యాప్తంగా పలు రాష్ట్రాలు కరోనా నేపథ్యంలో హైఅలర్ట్ ప్రకటించి విద్యాసంస్థలకు, సినిమా హాళ్లు, జనసామార్థ్యం అధికంగా వున్న ప్రాంతాల్లో జనం గుమ్మిగూడకుండా చర్యలు చేపట్టారు. దేశమొత్తమ్మీద ఇప్పటివరకు 167 కరోనా కేసులు నమోదైనట్టు అధికారిక గణాంకాలు వెల్లడిస్తున్నాయి.

కేంద్ర ఆరోగ్య, కుటుంబ సంక్షేమ శాఖ నివేదికల ప్రకారం కరోనా పాజిటివ్ కేసులు అత్యధికంగా మహారాష్ట్రలో నమోదయ్యాయి. మహారాష్ట్రలో 42 మంది కరోనా బాధితులను గుర్తించారు. ఆ తరువాత కేరళలలో 25 మంది ఈ వైరస్ బారిన పడ్డారు. ఇక ఈ రెండు రాష్ట్రాల తరువాత ఉత్తర్ ప్రదేశ్, తెలంగాణ రాష్ట్రాల్లో కరోనా బాధితులు అధికంగా వున్నారు. ఈ నేపథ్యంలో ఢిల్లీ ప్రభుత్వం దేశరాజధానిలోని పలు ప్రాంతాల్లో 144 సెక్షన్ ను విధించారు. కాగా, ఏపీలో పాజిటివ్ కేసు ఒక్కటేనని నివేదికలో పేర్కొన్నారు.