ముంబై-అహ్మదాబాద్ మధ్య పట్టాలెక్కిన రెండో ప్రైవేటు రైలు

Posted: 01/17/2020 04:38 PM IST

Ahmedabad mumbai tejas express irctc s second train flagged off

భారత రైల్వే చరిత్రలోనే తొలి ప్రైవేటు రైలుగా పేరుగాంచిన తేజస్‌ ఎక్స్‌ప్రెస్‌.. ఇవాళ రెండో మార్గంలో అందుబాటులోకి వచ్చింది. ప్రధాన మంత్రి సొంత నియోజకవర్గం వారణాసి నుంచి ఢిల్లీకి పయనమయ్యే తొలి ప్రైవేటు రైలు ఇక తన మార్గాలను విస్తరించుకుంది. ఢిల్లీ నుంచి వారణాసీ తరువాత తాజాగా అహ్మదాబాద్‌-ముంబయి మార్గంలో తేజస్‌ రైలును పరుగులు పెట్టనుంది. ఐఆర్సీటీసీకి చెందిన రెండో ప్రైవేటు రైలు మార్గాన్ని గుజరాత్‌ ముఖ్యమంత్రి విజయ్‌ రూపానీ ఇవాళ లాంఛనంగా జెండా ఊపి ప్రారంభించారు.

వారంలో గురువారం మినహా అన్ని రోజుల పాటు ఈ రైలు ఈ మార్గంలో సేవలు అందించనుంది. గుజరాత్‌ నుంచి కేవలం ఆరున్నర గంటల్లో ఈ రైలు ముంబయి చేరుకోనుంది. ఇవాళ లాంఛనంగా ప్రారంభమైనా ఈ నెల 19 నుంచి ఈ రైలు వాణిజ్యపరంగా సేవలను అందించనుంది. తేజస్‌ రైలు ప్రారంభోత్సవానికి కేంద్ర రైల్వేశాఖ మంత్రి పీయూష్‌ గోయల్‌ హాజరుకావాల్సి ఉండగా.. వాతావరణం అనుకూలించకపోవడంతో ఆయన రాలేకపోయారు. ఈ విషయాన్ని బీజేపి ఎంపీ కిరిట్ సోలంకీ మీడియాకు తెలిపారు. దీంతో గుజరాత్ సీఎం దీనిని ప్రారంభించారన్నారు.

తేజస్ రైలు ఆగమనంలో మహారాష్ట్ర, గుజరాత్ రాష్ట్రాలు లబ్దిపోందుతాయని గుజరాత్ ముఖ్యమంత్రి విజయ్ రూపానీ అశాభావం వ్యక్తం చేశారు. తేజస్ రైలు తమ రాష్ట్రానికి గర్వకారణమని చెప్పుకోచ్చారు. ఇదే మార్గంలో బుల్లెట్‌ రైలు కోసం పనులు జరుగుతున్నట్లు తెలిపారు. ఇక బుల్లెట్ రైలు కూడా అందుబాటులోకి వస్తే రెండు రాష్ట్రాలు అభివృద్దలో మిగతా రాష్ట్రాలతో పోటీపడుతూ దూసుకుపోవడం ఖాయంగా చెప్పుకోచ్చారు. అధునాతన సౌకర్యాలు, హంగులతో తేజస్ రైలును తీసుకొచ్చారు. దేశవ్యాప్తంగా 100 మార్గాల్లో 150 రైళ్లను ప్రైవేటు ఆపరేటర్ల ఆధ్వర్యంలో నడపాలని రైల్వేశాఖ యోచిస్తోంది.