తూగోలో ఘెర రోడ్డుప్రమాదం.. 8 మంది మృతి..

Posted: 10/15/2019 03:05 PM IST

Eight dead after tourist bus falls into tribal area valley in andhra pradesh

తూర్పు గోదావరి జిల్లాలో ఘోర రోడ్డు ప్రమాదం చోటుచేసుకుంది. భద్రాది రామయ్యను దర్శించుకుని అక్కడి నుంచి అన్నవరం సత్యదేవుడిని దర్శించుకునేందుకు బయల్ధేరిన ఆ భక్తజన బృందానికి ఈ యాత్రే ఆఖరి యాత్రగా మారింది. వారు ప్రయాణిస్తున్న వాహనం మార్గమధ్యంలో అదుపుతప్పి లోయలో పడింది. దీంతో వాహనంలో ప్రయాణిస్తున్న వారిలో అధికులు తిరిగిరానిలోకాలకు తరలివెళ్లారు.

ఈ ఘటన మారేడుమిల్లి - చింతూరు మధ్య సంభవించింది. భద్రాచలం నుంచి అన్నవరం దైవ దర్శనానికి వెళ్తుండగా ఘాట్ రోడ్డులోని వాల్మీకి కొండ వద్ద టెంపో వాహనం అదుపుతప్పి లోయలో పడింది. ఈ ఘటనలో మొత్తం ఎనమిది మంది దుర్మరణం చెందారు. ఇద్దరికి తీవ్ర గాయాలయ్యాయి. ఘటనాస్థలంలో ఆరుగురు అక్కడికక్కడే మృతిచెందగా.. ఆస్పత్రికి తరలిస్తుండగా మార్గమధ్యంలోనే మరొకరు ప్రాణాలు కోల్పోయారు.

కాగా మరోకరు అస్పత్రిలో చికిత్స పోందుతూ మృతిచెందారు. ఈ ప్రమాద ఘటనలో గాయాలపాలైన క్షతగాత్రులను రంపచోడవరం ప్రభుత్వ ఆస్పత్రికి తరలించి చికిత్సను అందిస్తున్నారు. ఘటనాస్థలికి చేరుకున్న పోలీసులు, అధికారులు సహాయక చర్యలు చేపట్టారు. టెంపో మారేడుమిల్లి నుంచి బయల్దేరిన కొద్దిసేపటికే ఈ ప్రమాదం చోటుచేసుకుందని ప్రత్యక్షసాక్షులు చెబుతున్నారు.

పర్యాటకులంతా కర్ణాటక రాష్ట్రం చిత్రదుర్గం జిల్లాలోని చెలకెరి గ్రామస్థులుగా పోలీసులు గుర్తించారు. భద్రాచలం దర్శనం అనంతరం అన్నవరం వెళ్తుండగా ఈ ఘోరం చోటుచేసుకుంది. ప్రమాద సమయంలో టెంపోలో 12 మంది ప్రయాణికులు ఉన్నట్లు సమాచారం. అయితే ఈ రహదారిపై వాహనం అదుపుతప్పి ప్రమాదం సంభించిందా.? లేక మరేదైనా కారణమా అన్న కోణంలో పోలీసులు కేసు దర్యాప్తు చేస్తున్నారు.

మారేడుమిల్లి-చింతూరు రహదారి లోయలు, గుట్టలతో చాలా ప్రమాదకరంగా ఉంటుంది. ఇటీవల భారీ వర్షాలు కురుస్తుండటంతో ఈ మార్గం మరింత ప్రమాదకరంగా మారింది. దట్టమైన అటవీప్రాంతంలో ఉన్న ఈ రహదారిలో చాలా నైపుణ్యం ఉన్న డ్రైవర్లు మాత్రమే ఎక్కువగా వాహనాలు నడుపుతుంటారని.. కొత్తగా వచ్చేవారు ప్రమాదాలకు గురయ్యే అవకాశాలు ఉన్నాయని స్థానికులు చెబుతున్నారు.