కేన్సర్‌ ను నిర్మూలించే బ్రహ్మాస్త్రం.. వెంటనే విమర్శలు

Posted: 02/01/2019 04:09 PM IST

ప్రపంచవ్యాప్తంగా ఏటా లక్షలాది మందిని కబళిస్తున్న కేన్సర్‌ మహమ్మారిని నిర్మూలించే బ్రహ్మాస్త్రం దొరికిందా? కేన్సర్‌ను పూర్తిగా నయం చేసే చికిత్స అందుబాటులోకి రానుందా? ఇజ్రాయెల్‌కు చెందిన ‘యాక్సిలరేటెడ్‌ ఎవల్యూషన్‌ బయోటెక్నాలజీస్‌’ శాస్త్రవేత్తలు ఈ ప్రశ్నలకు అవుననే సమాధానమే ఇస్తున్నారు. కీమో థెరపీ, రేడియేషన్‌.. ఇలా ఎన్ని చేసినా కేన్సర్‌ రోగుల ప్రాణాలకు గ్యారెంటీ లేని పరిస్థితి నుంచి వాడిన తొలి రోజు నుంచే ఫలితాలను చూపే చికిత్సను తాము రూపొందించామని వారు చెబుతున్నారు.

అంతేకాదు ఈ చికిత్స వల్ల.. కీమో, రేడీయేషన్‌ లాగా ఎలాంటి దుష్ప్రభావాలూ ఉండవని స్పష్టం చేస్తున్నారు. ఈ చికిత్స గురించి.. యాక్సిలరేటెడ్‌ ఎవల్యూషన్‌ బయోటెక్నాలజీస్‌ సీఈవో డాక్టర్‌ ఇలాన్‌ మొరాద్‌ ‘జెరూసలెం పోస్ట్‌’ వార్తాసంస్థకు ఇచ్చిన ఒక ఇంటర్వ్యూలో తెలిపారు.
 
ఏమిటా చికిత్స: కేన్సర్‌ను నయం చేసేందుకు తాము రూపొందించిన చికిత్సను మల్టీ-టార్గెట్‌ టాక్సిన్‌ (మ్యుటాటో) థెరపీగా వ్యవహరిస్తున్నట్టు మొరాద్‌ తెలిపారు. బ్యాక్టీరియా వల్ల ఏదైనా అనారోగ్యం వస్తే.. యాంటీబయాటిక్‌లు దాన్ని ఎంత సమర్థంగా నయం చేయగలవో ఈ మ్యుటాటో చికిత్స కూడా అలాగే ‘కేన్సర్‌ యాంటీబయాటిక్‌’గా పనిచేస్తుందని ఆయన వివరించారు. ఈ చికిత్సలో భాగంగా తాము ఉపయోగించే ‘కేన్సర్‌ టార్గెటింగ్‌ పెప్టైడ్‌’లు.. కేన్సర్‌ కణాలు ఉత్పరివర్తనం చెందకుండా చేస్తాయని వెల్లడించారు.
 
ఈ పెప్టైడ్‌లు కేన్సర్‌ కణాలపై మూడు వైపుల నుంచి దాడి చేసి వాటిని నిర్వీర్యం చేస్తాయని వివరించారు. తాము ఎలుకలపై చేసిన ప్రయోగాల్లో ఈ చికిత్స అద్భుత ఫలితాలనిచ్చిందని చెప్పారు. దీనికి ఎక్కువ ఖర్చు కూడా కాదని వివరించారు.
 
విమర్శల వెల్లువ: కేన్సర్‌ను నయం చేసే చికిత్స అంటూ ఇజ్రాయెల్‌ కంపెనీ చేసిన ప్రకటనను ప్రపంచవ్యాప్తంగా పలువురు ఆంకాలజిస్టులు విమర్శిస్తున్నారు. ఆ సంస్థ తన ప్రయోగాలను కేవలం ఎలుకలపైనే చేసిందని.. మనుషులపై ఇంకా ప్రయోగాలు చేయనే లేదని వారు గుర్తుచేస్తున్నారు. ఇది కేన్సర్‌ రోగుల్లో అనవసరంగా ఆశలు పెంచడమేనని.. మొరాద్‌ తీరు బాధ్యతారహితంగా ఉందని ఆగ్రహం వ్యక్తం చేస్తున్నారు.