ITEMVIDEOS: తెలంగాణ ప్రభుత్వ దిగజారుడు ప్రచారం.. భర్తనే మార్చిన వైనం..

Posted: 08/20/2018 11:29 AM IST

Telangana goverment morphs photo of couple wife demands justice

పారదర్శక పాలనకు తమ ప్రభుత్వం ప్రతిభింభమని ఓ వైపు అధికార పార్టీకి చెందిన నాయకులు ఊదరగోడుతున్నా.. అవినీతి, లంచగొండితనం అంశాలకు సంబంధించి 'సెంటర్ ఫర్ మీడియా స్టడీస్-సీఎంఎస్' నిర్వహించిన సర్వేలో తెలంగాణ రాష్ట్రం ఏకంగా రెండో స్థానాన్ని సంపాదించిందని బయటపెట్టింది. అయినా అదేమీ పట్టనట్లు వ్యవహరిస్తున్న ప్రభుత్వం అధికారులు అవినీతిపై ఒక్క మాట కూడా మాట్లాడకుండా వారిని వెనకేసుకువచ్చే పనులకు శ్రీకారం చుట్టింది. ఈ క్రమంలో మరోమారు అధికారుల పనితీరును తెలంగాణ ప్రభుత్వ ప్రచార ప్రకటనలు బయటపెట్టాయి.

తెలంగాణ ప్రభుత్వం పరువును బజారుకు ఈడ్చేలా.. ఓ అభంశుభం తెలియని అమాయకురాలికి తన భర్త ఎవరో తెల్చుకోమ్మని పరీక్షను విధించేలా చేసింది తెలంగాణ సర్కార్. అసలు ఏ మాత్రం భూమి కూడా లేని తమకు భూమి ఉందంటూ.. రైతు భీమా అందినట్లు చూపించే ఒక ఫోటో తెలంగాణ ప్రచారపర్వంలో వున్న డొల్లతనాన్ని బయటపెడుతుంది. ఇక కంటి వెలుగు అనే కార్యక్రమానికి ప్రకటనలో అదే మహిళ.. అదే బిడ్డ.. కానీ భర్త మాత్రం మారిపోయాడు. దీంతో సదరు మహిళ అటు కుటుంబంలోనూ.. ఇటు బంధువులలోనూ సూటిపోటి మాటలను ఎదుర్కోవాల్సి వస్తుంది.

తన అనుమతి లేకుండా, తెలంగాణ ప్రభుత్వ ప్రకటనల్లో తన భర్తగా వేరొకరిని చూపడాన్ని సూర్యాపేట జిల్లా కోదాడ మండలం తొగ్రాయికి చెందిన మహిళ పద్మ ఆగ్రహాన్ని వ్యక్తం చేసింది. కంటివెలుగు కార్యక్రమం ప్రారంభోత్సవం సందర్భంగా కేసీఆర్ సర్కారు పేపర్లలో ప్రకటనలు ఇచ్చిన వేళ, కొన్ని ప్రకటనల్లో పద్మ భర్తగా ఒకరిని, మరికొన్ని ప్రకటనల్లో ఇంకొకరిని చూపించారు. తన భర్త ఫొటోను మార్చడంపై తీవ్ర అభ్యంతరాన్ని వ్యక్తం చేసింది. ప్రస్తుతం యాదగిరి సమీపంలోని కొంగవల్లిలో ఉంటున్న తమ వద్దకు వచ్చి మూడు సంవత్సరాల క్రితం కొందరు ఫొటోలు తీసుకున్నారని ఆమె గుర్తు చేసుకుంది.

ఆపై తాము కాపుసారా కాచుకుని, దాన్ని తాగేవాళ్లమని, ఇప్పుడు సారా కాయడం లేదని, ఆనందంగా ఉన్నామని చెబుతూ పేపర్లో ప్రకటన ఇచ్చారని, ఆ తరువాత రైతు బంధు పథకం పెట్టిన సమయంలో తమకు పొలం ఉందని, రూ. 4 వేలు ప్రభుత్వం నుంచి అందుకుని ఆనందంగా ఉన్నామని మరో ప్రకటన వేశారని తెలిపింది. కంటివెలుగు ప్రారంభం సమయంలో తన భర్త ఫొటో బదులు వేరొకరి ఫొటో పెట్టారని ఆమె ఆరోపించింది. దాన్ని చూసిన చాలామంది తమను గేలి చేసి మాట్లాడుతున్నారని విలపించిన ఆమె, తాను తలెత్తుకు తిరగలేకపోతున్నానని వాపోయింది. తమకు పొలం లేదని, అయినా చెక్కులిచ్చినట్టు చూపించారని, ఈ విషయాన్ని కాంగ్రెస్ నేత మల్లు భట్టి విక్రమార్క దృష్టికి తీసుకెళ్లామని తెలిపారు.