బిగ్ బి అమితాబ్ ఫ్యామిలీ ఫోటో వైరల్..

Posted: 07/10/2018 12:32 PM IST

బిగ్ బి బాలీవుడ్ మెగాస్టార్ అమితాబ్ బచ్చన్ తన అభిమానులతో నిత్యం తన సోషల్ మీడియా ద్వారా అందుబాటులో వుంటారన్న విషయం అందరికీ తెలిసిందే. అయితే సోషల్ మీడియాలో అనవసర విషయాలను ప్రాథాన్యం ఇవ్వడం అసలు ఇష్టంలేని అమితాబ్.. ఆ మధ్య ముంబైలో తన మిత్రుడి అంత్యక్రియలకు హాజరుకాగా, అక్కడ కూడా అభిమానులు విషాదవాతవరణాన్ని కాదని, ఫోటోలకు, సెల్పీలను కోరడంతో ఆయన అవేదన వ్యక్తం చేసిన విషయం తెలిసిందే.

తాజాగా సెల్ ఫోన్లు, సోషల్ మీడియా ఎలాంటి ప్రభావాన్ని చాటుతుందో అని చెప్పడానికి ఆయన తన ఇంటిసభ్యుల ఫోటోనే ఒకటి ఫొటో షేరింగ్ యాప్ ఇన్ స్టాగ్రా‌మ్ లో షేర్ చేశారు. అది కాస్తా నెట్టింట్లో వైరల్ గా మారడంతో పాటు అందరినీ ఆలోచింపజేస్తోంది. ప్రస్తుత సమాజంలో కుటుంబ సంబంధాలు ఎలా ఉన్నాయన్న విషయానికి ఇది అద్దం పడుతోంది. అందరి చేతా ‘ఔరా’ అనిపించే ఈ ఫొటోకు ఇప్పటికే లక్షలాది లైకులు వచ్చాయి.

అమితాబ్ షేర్ చేసిన ఫొటోలో ఆయన కుటుంబం అంటే.. చిన్నారులు శ్వేతా బచ్చన్ నందా, అభిషేక్ బచ్చన్, మనవళ్లు నవ్యా నావెలి నందా, అగస్త్య తదితరులు ఉన్నారు. ఇందులో విశేషం ఏంటని అంటారా.. అందరూ ఒకే హాల్‌లో ఒకరికి ఒకరు అందేంత దూరంలో కూర్చున్నా.. రూములో అంతమంది ఉన్నా ఆ గదిలో నిశ్శబ్దం రాజ్యమేలుతోంది. కారణం.. ప్రతీ ఒక్కరి చేతుల్లోనూ మొబైల్ ఉంది. అందరూ అందులోనే మునిగిపోయారు. తదేక దీక్షతో ‌మొబైల్ ను ఆపరేట్ చేస్తూ ప్రపంచాన్ని మైమరచిపోయారు. దీంతో ‘‘అందరూ ఒక చోటే ఉన్నారు. వారితో ఫోన్లు కూడా ఉన్నాయి’’ అంటూ అమితాబ్ తన ఫొటోకు క్యాప్షన్ రాశారు. ఈ ఫోటోలో అందరూ స్మార్ట్ ఫోన్ లో మునిగిపోతే ఒక్క నవ్య ఒక్కర్తే పుస్తకం చదువుతూ కూర్చోవడం విశేషం.