కిడ్నాప్ అయిన పురిట్లోని బిడ్డ అచూకీ లభ్యం.. సురక్షితం

Posted: 07/03/2018 05:22 PM IST

Baby girl abducted from koti maternity hospital safe in bidar

హైదరాబాద్‌లోని కోఠి ప్రభుత్వ ప్రసూతి ఆసుపత్రిలో అదృశ్యమైన ఆడశిశువు ఆచూకీ పోలీసులకు దొరికింది. ఆ పాప బీదర్ లో ఉందని తెలుసుకున్న హైదరాబాద్‌ పోలీసులు అక్కడకు వెళ్లి ఆమెను స్వాధీనం చేసుకున్నారు. అక్కడి నుంచి తిరిగి హైదరాబాద్‌కు తీసుకువస్తున్నారు. కాగా, రంగారెడ్డి జిల్లా మంచాల మండలం ఎల్లమ్మ తండాకు చెందిన విజయ అనే మహిళ ఆడశిశువుకు జన్మనిచ్చి, ఆమె కదల్లేని స్థితిలో ఆసుపత్రిలో ఉంటోంది. విజయ వద్ద ఎవరూ లేని సమయం చూసుకున్న ఓ మహిళ ఓ పథకాన్ని వేసుకుంది.

పాపకు టీకా ఇచ్చారా.. అంటూ వచ్చి టీకా వేయిస్తానంటూ మాయమాటలు చెప్పి కథల్లేని స్థితిలో వున్న తల్లి పక్కలోంచి బిడ్డను తీసుకెళ్లి, తిరిగి రాలేదు. అనుమానం వచ్చిన విజయ కనిపించిన నర్సులను విచారించగా.. పాపను తాము తీసుకెళ్లలేదని చెప్పడంతో.. అందోళనకు గురైంది. విషయం తెలుసుకున్న విజయ బంధువులు పెద్ద సంఖ్యలో అసుపత్రికి చేరుకుని పురిట్లోని బిడ్డను ఎత్తుకెళ్లడమేంటని అందోళన వ్యక్తం చేశారు. ఈ ఘటనపై వెంటనే చర్యలు తీసుకోవాలని డిమాండ్ చేశారు.

రంగంలోకి దిగిన పోలీసులు కేసు నమోదు చేసుకుని.. సీసీటీవీ దృశ్యాలను పరిశీలించగా పలు ఆధారాలు లభ్యమయ్యాయి. అపహరణకు గురైన చిన్నారి ఆచూకీ కోసం గాలించేందుకు 6 బృందాలను ఏర్పాటు చేశారు. చిన్నారి కిడ్నాప్ అయ్యిందన్న వార్త దవానంలా వ్యాపించడంతో.. ఎత్తుకెళ్లిన కిడ్నాపర్ పాపను బీదర్ లోని ఓ ప్రభుత్వాసుపత్రిలో వదిలేసి వెళ్లింది. దీంతో అక్కడే చిన్నారి శిశువుకు వైద్య చికిత్సలు అందిస్తున్నారు. దీంతో శిశువు తల్లిదండ్రులను పోలీసులు ప్రత్యేక వాహనంలో బీదర్ తరలిస్తున్నారు. కాగా, నిందితురాలి కోసం పోలీసులు గాలింపు ముమ్మరంగా కొనసాగుతుంది.