సమ్మె సైరన్ మ్రోగించిన తెలంగాణ ఆర్టీసీ.. ఈ నెల 11 నుంచే..

Posted: 06/04/2018 08:16 PM IST

తెలంగాణలో ఆర్టీసీ కార్మికులు సమ్మె సైరన్ మోగించారు. వేతన సవరణ డిమాండ్‌తో జూన్ 11 నుంచి నిరవధిక సమ్మెకు తెలంగాణ మజ్దూర్‌ యూనియన్‌(టీఎంయూ) పిలుపునిచ్చింది. ఈ మేరకు టీఎస్ఆర్టీసీ సంఘాల కేంద్ర కమిటీ భేటీలో నిర్ణయం తీసుకున్నారు. నిరసనలు, నిరవధిక సమ్మెకు పిలుపునిచ్చాయి. ఈ మేరకు సంస్థలో గుర్తింపు పొందిన ‘తెలంగాణ మజ్దూర్‌ యూనియన్‌(టీఎంయూ)’ నేతలు ఆర్టీసీ పరిపాలనా విభాగం ఎగ్జిక్యూటివ్‌ డైరెక్టర్‌ శివకుమార్ కు నోటీసు అందజేశారు.

ఈ సందర్భంగా టీఎంయూ ప్రధాన కార్యదర్శి అశ్వత్థామరెడ్డి మాట్లాడుతూ.. కార్మికుల సమస్య పరిష్కారానికి ఆర్టీసీలోని అన్ని సంఘాలు కలిసిరావాలని కోరారు. నిరసనలో భాగంగా.. జూన్ 7 నుంచి సమ్మె సన్నాహకాలు ప్రారంభించనున్నారు. 7న ఎర్రబ్యాడ్జిలు ధరించి నిరసనలు, 8న ప్రాంతీయ కార్యాలయాల ముందు ఆర్టీసీ సంఘాలు సామూహిక నిరాహార దీక్షలు చేపట్టనున్నారు. జూన్‌ 11 నుంచి కార్మికులు నిరవధిక సమ్మెకు దిగనున్నారు.