దత్తన్నకు కొడుకు మరణం వార్త తెలిసింది ఉదయమే..!

Posted: 05/23/2018 11:59 AM IST

Bjp mp bandaru dattatreya knows of his son demise in morning

తన ఒక్కగానోక్క కుమారుడు వైష్ణవ్ మంగళవారం అర్ధరాత్రి 12.30 గంటల సమయంలో తుదిశ్వాస విడిచినా.. కేంద్ర మాజీ మంత్రి, బీజేపీ ఎంపీ బండారు దత్తాత్రేయకు మాత్రం ఆ విషాద వార్తను బుధవారం ఉదయం ఐదు గంటలకు తెలిసింది. అర్థరాత్రి సమయంలో తన కొడుకు మరణించిన వార్తను వైద్యులు అయనకు తెలియజేయలేదు. అర్థరాత్రి సమయంలో కొడుకు పరమపదించాడన్న చేధువార్తను చెప్పే ధైర్యం వైద్యులు చేయలేదు. దీనికి తోడు ఇలాంటి కటువైన వార్తను అర్థరాత్రి నిద్రపోతున్న వ్యక్తులను లేపి చెప్పితే వారి అరోగ్య పరిస్థితులపై కూడా ప్రభావం పడుతుందని వైద్యులు ఇలా చేశారని సమాచారం.

హైదరాబాద్ రాంనగర్ లోని నివాసంలో మంగళవారం రాత్రి పదిన్నర గంటలకు కుటుంబ సభ్యులందరూ కలిసి భోజనం చేస్తుండగా బండారు వైష్ణవ్ ఒక్కసారిగా కుప్పకూలిపోయాడు. వెంటనే బండారు దత్తాత్రేయ. డాక్టర్ ఆవుల రామచంద్రరావు తదితరులు సమీపంలోనే ఉన్న గురునానక్ కేర్ ఆసుపత్రిలో చేర్చారు. ‘సార్.. ఏం కాదు.. మేము చూసుకుంటాం కదా మీరు ఇంటికెళ్లండి’ అని రామచంద్రారావు తదితరులు చెప్పడంతో ఎంపీ దత్తాత్రేయ ఇంటికెళ్లి నిద్రపోయారు. తరువాత పన్నెండున్నర గంటల సమయంలో వైష్ణవ్ మరణించాడని డాక్టర్లు అధికారికంగా ప్రకటించారు.

మీడియా ప్రతినిధుల ద్వారా విషయం తెలుసుకున్న హైదరాబాద్ నగర మేయర్ బొంతు రామ్మోహన్ రాత్రి ఒంటి గంటకు వచ్చి పరామర్శించి వెళ్లారు. బీజేపీ రాష్ట్ర అధ్యక్షుడు, ముషీరాబాద్ ఎమ్మెల్యే డాక్టర్ లక్ష్మణ్, శాసనసభ్యుడు చింతల రామచంద్రారెడ్డి తెల్లవారు మూడు గంటలకు ఆసుపత్రికి చేరుకున్నారు. వైష్ణవ్ మరణించిన విషయం తెలుకుని.. ఆ విషాద వార్తను దత్తాత్రేయకు ఉదయం 5 గంటలకు ఫోన్ ద్వారా తెలియజేశారు. విషయం తెలుకున్న దత్తాత్రేయ హుటాహుటిన తన సతీమణితో కలిసి ఆసుపత్రికి చేరుకున్నారు. జీవం లేని కుమారుడిని చూసి బోరున విలపించారు.