ఢిల్లీ సినిమా థియేటర్లో రాహుల్ అండ్ ఫ్రెండ్స్..

Posted: 05/02/2018 01:47 PM IST

కర్ణాటక అసెంబ్లీ ఎన్నికల నేపథ్యంలో ప్రచారానికి వెళ్లిన కాంగ్రెస్ అధ్యక్షుడు రాహుల్ గాంధీ.. భయంకరమైన అనుభవం నుంచి బయటపడిన క్రమంలో కర్ణాటక ఎన్నికల తరువాత తాను మానస సరోవర్ వెళ్లి కైలాష్ నాథ్ దర్శనాన్ని చేసుకుని వస్తానన్న విషయం తెలిసిందే. అయితే ఈ విషయాన్ని ‘జన్ ఆక్రోశ్‌’ ర్యాలీ ఆయనే స్వయంగా చెప్పి.. కాంగ్రెస్ శ్రేణుల అనుమతిని కూడా కోరిన విషయం తెలిపిందే. కాగా, ఈ లోపు జన్ అక్రోశ్ సభ ఇచ్చిన వెన్నుధన్నో లేక.. కర్ణాటకలో తామే గెలుస్తామన్న ధీమానో తెలియదు కానీ.. తన స్నేహితులతో కలసి కొంత రిలాక్స్ కావాలని భావించారు.

అంతే అనుకున్నదే తడవుగా ఆయన తన స్నేహితులతో కలసి ఢిల్లీలోని నెహ్రూ ప్లేస్ లో ఉన్న ఐనాక్స్‌ థియేటర్ ఇటీవలే విడుదలై సంచలనాలకు తెరతీస్తూ కలెక్షన్లు రాబడుతున్న ‘అవెంజర్స్‌: ఇన్ ఫినిటీ వార్’ సినిమాను వీక్షించారు. ఇక్కడ మరో ఆసక్తికర అంశం కూడా వుంది. రాహుల్‌ గాంధీ నిత్యం కనిపించే విధంగా తెలుపు రంగు దుస్తుల్లో కాకుండా.. ఈసారి కొత్తగా టీషర్ట్‌లో కన్పించారు. ఈ తరహా డ్రెసింగ్ లో రాహుల్ నిజంగానే యువరాజులా అగుపించారు.

అయితే రాహుల్‌ సినిమా చూడటంపై ప్రతిపక్షాలు విమర్శిస్తున్నాయి. ఓ పక్క ఎన్నికలు దగ్గరపడుతుంటే ఇప్పుడు రాహుల్‌కి సినిమా చూడాల్సిన అవసరం ఏముందంటూ విమర్శలు చేస్తున్నారు. వీటిపై ఓ కాంగ్రెస్‌ నేత స్పందిస్తూ..‘1984లో జరిగిన లోక్‌సభ ఎన్నికల్లో బీజేపి ఓడిపోయినప్పుడు అటల్‌ బిహారీ వాజ్ పేయ్‌, ఎల్కే అద్వానీ కూడా ఢిల్లీలోని ఓ థియేటర్ లో సినిమా వీక్షించేందుకు వెళ్లారు. గుజరాత్‌ ఎన్నికలు, ‘జన్‌ ఆక్రోశ్‌’ ర్యాలీ తర్వాత ఎంతో అలసిపోయిన రాహుల్‌ ఒక సినిమా చూస్తే తప్పేంటి?’ అని ప్రశ్నించారు.