లాలూకు 14 ఏళ్ల జైలు శిక్ష, రూ.60 లక్షల జరిమానా

Posted: 03/24/2018 12:27 PM IST

Lalu prasad sentenced to 14 yrs in prison in fourth fodder scam case

బీహార్ మాజీ ముఖ్యమంత్రి, ఆర్జేడీ చీఫ్ లాలూ ప్రసాద్ యాదవ్ మెడకు బిగుసుకున్న దాణా కుంభకోణంలోని నాలుగో కేసులో ఆయనకు మరో ఏడేళ్ల జైలు శిక్ష పడింది. దీంతో మొత్తంగా ఆయనకు 14 ఏళ్ల శిక్ష పడింది. దుమ్కాకు సంబంధించిన ఈ కేసులో ఆయనను దోషిగా నిర్ధారించిన రాంచీ సీబిై ప్రత్యేక న్యాయస్థానం సొమవారం రోజున తీర్పును వెలువరించగా, ఇవాళ ఈ నాలుగో కేసుకు సంబంధించిన శిక్షను ఖరారు చేసింది. దీంతో పాటు రూ.60 లక్షల జరిమానాను కూడా విధించింది.

కాగా, దాణా కుంభకోణానికి సంబంధించి ఇదివరకే తీర్పును వెల్లడించిన న్యాయస్థానం గత మూడు కేసుల్లోనూ ఆయనను దోషిగా నిర్ధారించిన రాంచీ ప్రత్యేక కోర్టు ఆయనకు శిక్షను విధించిన విషయం తెలిసిందే. దీంతో ఆయన జైలు శిక్షను అనుభవిస్తున్నారు. రూ. 3.18కోట్ల ప్రభుత్వ నిధులను దుర్వినియోగం చేసిన ఈ కేసులో నాటి ముఖ్యమంత్రి లాలూ సహా మొత్తం 19 మందికి ఇవాళ శిక్షలు ఖరారు చేసింది. లాలూకి ఏడేళ్ల జైలు శిక్షతో పాటు రూ.30 లక్షల జరిమానా విధించింది. కాగా, ఇదే కేసులో బీహార్ మాజీ సీఎం జగన్నాథ్ మిశ్రా సహా మొత్తం 12 మందిని కోర్టు నిర్దోషులుగా ప్రకటించింది.

2013లో మొదటి కేసులో ఆయన దోషిగా రుజువుకావడంతో ఐదేళ్ల జైలు శిక్ష పడింది. గతేడాది డిసెంబర్ 23న రెండో కేసులోనూ అక్రమాలకు పాల్పడినట్టు తేలడంతో ధర్మాసనం మూడున్నరేళ్ల కారాగార శిక్ష విధించింది. ఇక జనవరి 24న మూడోకేసుపై వెలువడిన తీర్పులో లాలూకి ఐదేళ్ల జైలు శిక్ష ఖరారైంది. తాజాగా ఏడేళ్ల జైలు శిక్ష పడడంతో లాలూకి మొత్తం 20 సంవత్సరాలకు పైగా జైలు శిక్ష పడినట్టైంది. ప్రస్తుతం లాలూ ప్రసాద్ యాదవ్ రాంచీలోని బిస్రా ముండా సెంట్రల్ జైలులో శిక్ష అనుభవిస్తున్నారు.