శ్రీదేవి మృతదేహ తరలింపునకు లైన్ క్లియర్

Posted: 02/27/2018 03:40 PM IST

దుబాయ్‌లోని ఓ హోటల్ గదిలో బాత్‌టబ్‌లో మునిగి మృతి చెందిన శ్రీదేవి భౌతికకాయాన్ని ఆమె కుటుంబ సభ్యులకు కాసేపట్లో అప్పగించనున్నారు. ఇందుకు సంబంధించి ప్రాసిక్యూషన్ అధికారులు క్లియరెన్స్ లేఖ ఇచ్చారు. దీంతో ఆమెను అక్కడి నుంచి కాసేపట్లో ముంబయికి తరలించనున్నారు.

ప్రస్తుతం శ్రీదేవి భౌతిక కాయానికి రసాయన ప్రక్రియ(ఎంబామింగ్‌) పూర్తి చేస్తున్నారు. ఆ తరువాత ఆమెను ప్రత్యేక విమానంలో ముంబయి తీసుకురావడానికి దాదాపు 4 గంటలు పడుతుంది. కాగా, కేసులో అనేక అనుమానాలు వ్యక్తమవుతోన్న విషయం తెలిసిందే. శ్రీదేవి ప్రమాదవశాత్తు నీళ్లలో పడి మునిగి మృతి చెందారని అక్కడి ఆరోగ్య శాఖ పేర్కొన్న విషయంపై పలువురు అనుమానాలు వ్యక్తం చేస్తున్నారు. అయితే, మంగళవారం పూర్తి ఫోరెన్సిక్‌ నివేదిక వచ్చేవరకు వేచిచూసి.. ఆతర్వాతే శ్రీదేవి భౌతికకాయాన్ని విడుదల చేసినట్టు తెలుస్తోంది.

ప్రక్రియ ఆలస్యంగా అవుతుండటంతో తండ్రితో ఉండటానికి బాలీవుడ్‌ నటుడు అర్జున్‌కపూర్‌ దుబాయ్‌ బయలుదేరాడు. దుబాయ్‌ పోలీసులు అనుమతి ఇవ్వడంతో అర్ధరాత్రి దాటిన తర్వాత శ్రీదేవి పార్థీవదేహం ముంబైకి చేరుకునే అవకాశం కనిపిస్తోంది. ఇక ఫోరెన్సిక్ నివేదికలో అనుమానాలు నివృత్తి కావటంతో కేసును కొట్టివేస్తున్నట్లు ప్రకటించిన ప్రాసిక్యూషన్ అధికారి, బోనీకపూర్ ముంబైకి వచ్చేందుకు గ్రీన్ సిగ్నల్ ఇచ్చేశారు.