ట్రిపుల్ తలాక్ బిల్లు.. గందరగోళం... రాజ్యసభ వాయిదా

Posted: 01/03/2018 04:27 PM IST

లోక్ సభలో ఆమోద ముద్ర వేయించుకున్న ట్రిపుల్ త‌లాక్ బిల్లుపై గంద‌ర‌గోళం చెల‌రేగింది. బుధవారం రాజ్యసభలో చర్చ పూర్తి కాకుండానే సభ రేపటికి వాయిదా పడింది. అధికార, విప‌క్ష స‌భ్యుల మ‌ధ్య మాట‌ల యుద్ధం తారా స్థాయిలోనే సాగింది.

రాజ్య‌స‌భ‌లో కేంద్ర మంత్రి ర‌విశంక‌ర్ ప్ర‌సాద్ ఈ బిల్లును ప్ర‌వేశ పెట్టారు. ట్రిపుల్ తలాక్ బిల్లును సెల‌క్ట్ క‌మిటీకి పంపాల‌ని విప‌క్ష స‌భ్యులు డిమాండ్ చేశారు. ట్రిపుల్ త‌లాక్ బిల్లును తాము వ్య‌తిరేకించ‌డం లేదని, సెలెక్ట్ క‌మిటీకి పంపాల‌న్న‌దే త‌మ‌ డిమాండని కాంగ్రెస్ స‌భ్యుడు ఆనంద్ శ‌ర్మ అన్నారు. మ‌హిళా సాధికార‌త అత్యంత ముఖ్య‌మైన అంశమ‌ని ఆయ‌న అన్నారు.

బిల్లులో స‌వ‌ర‌ణ‌లను చేయాల్సి ఉంద‌ని, వాటిని సెలెక్ట్‌ క‌మిటీ సూచిస్తుందని అన్నారు. అయితే, అందుకు కేంద్ర ఆర్థిక శాఖ మంత్రి అరుణ్ జైట్లీ అభ్యంత‌రం తెలిపారు. ఈ నేప‌థ్యంలో గంద‌ర‌గోళం నెల‌కొన‌డంతో రాజ్య‌స‌భ డిప్యూటీ ఛైర్మ‌న్ కురియ‌న్ స‌భ‌ను రేపు ఉదయం 11 గంటల వరకు వాయిదా వేశారు.