జైపూర్ లో ఘోరం.. ట్రాన్స్ ఫార్మర్ పేలి 14 మంది మృతి

Posted: 11/01/2017 10:16 AM IST

రాజస్థాన్ లో దారుణ ప్రమాదం చోటు చేసుకుంది. ట్రాన్స్ ఫార్మర్ పేలి 14 మంది మృతి చెందగా, 19 మందికి తీవ్ర గాయాలయ్యాయి. గాయపడిన వారిలో 11 మంది పరిస్థితి విషమంగా ఉన్నట్లు తెలుస్తోంది. మంగళవారం షాపూర్ జిల్లా ఖట్లోయి గ్రామంలో ఓ పెళ్లి వేడుకలో ఈ ప్రమాదం చోటుచేసుకుంది.

తొలుత ట్రాన్స్ ఫార్మర్ పేలి ఐదుగురు అక్కడిక్కడే చనిపోయారు. ఆపై విద్యుత్ ను పునరుద్ధరించే క్రమంలో భారీ పేలుడు సంభవించింది. ఆ సమయంలో హై వోల్టేజ్ వైర్ పడిపోయిందని.. విద్యుత్ ప్రసారాన్ని నిలిపివేయకపోవటంతోనే ప్రమాదం జరిగినట్లు ప్రత్యక్ష సాక్ష్యలు చెబుతున్నారు. క్షతగాత్రుల్లో ఓ గర్భిణి కూడా ఉండటంతో ఆమెను, కడుపులోకి బిడ్డను కాపాడేందుకు వైద్యులు ప్రయత్నించగా, శిశువు మరణించినట్లు తెలిపారు

విద్యుత్ శాఖ నిర్లక్ష్యమే ఈ ప్రమాదానికి కారణమంటూ ఆరోపిస్తూ గ్రామస్తులు ఆందోళనకు దిగారు. ఘటన గురించి తెలుసుకున్న ముఖ్యమంత్రి వసుంధర రాజే తన కార్యక్రమాలను రద్దు చేసుకుని క్షతగాత్రులు చికిత్స పొందుతున్న ఎస్ ఎం ఎస్ ఆస్పత్రికి బయలుదేరారు. ఉన్నతస్థాయి విచారణకు ఆదేశిస్తూ, మృతుల కుటుంబాలకు 10 లక్షల పరిహారం ఆమె ప్రకటించారు.