ఈ ఎస్ఐ చాలా చెడ్డోడు.. లైంగిక వేధింపులు..

Posted: 10/10/2017 07:23 PM IST

ప్రజా రక్షకులుగా, విపత్కర పరిస్థితుల్లో వారు చూపుతున్న ధైర్యసాహషాల నేపథ్యంలో సమాజంలో వారికి పెద్దఎత్తున గౌరవమర్యాదలున్నాయి. అయితే కొందరు మాత్రం ఈ గౌరవమర్యాదలు తమకే దక్కుతున్నాయని వ్యక్తిగతంగా భావించడం సమంజసంకాదు. ఇలా భావించిన కొందరు పోలీసులు తమ వృత్తికి కళంకం తీసుకురావడంతో పాటు.. వ్యక్తిగతంగా కూడా చాలా నష్టపోతారనడానికి ఇటీవల కాలంలో జరిగిన పలు ఘటనలు రుజువుచేస్తున్నాయి.

ప్రజలు వ్యక్తిగత విషయాలను కూడా చెప్పుకోవడంతో వారు సన్నిహితంగా మాట్లాడుతున్నారని భావించిన ఓ ఎస్ఐ తాజాగా వివాహిత మహిళను టార్గెట్ చేసి అమెను నిత్యం లైంగిక వేధింపులకు గురిచేస్తున్నాడు. కృష్ణా జిల్లాలో హనుమాన్‌ జంక్షన్‌ ఎస్‌ఐ విజయకుమార్‌ నూజివీడుకు చెందిన ఒక బ్యూటీషియన్ తో నెరపిన వివాహేతర సంబంధం అధికారులకు తెలిసి.. విధులకు దూరంగా (సస్పెండ్‌) వున్న విషయం తెలిసిందే. ఈ క్రమంలోనే నూజివీడుకు చెందిన ఒక ఎస్‌ఐ ఓ వివాహితను నిత్యం వేదిస్తున్నాడు.

తనను వేధించొద్దని మహిళ ఎంతగా ప్రాధేయపడినా.. ఎస్ఐ పట్టించుకున్న పాపాన పోలేదు. చివరకు తన బతుకు అల్లరిపాలు కావడం తనకు ఇష్టం లేదని, అలా జరిగితే తనకు అత్మహత్యే శరణ్యమని వేడుకున్నా ఆ కామాంధ ఎస్ఐ కనికరించలేదు. కుటుంబసభ్యులకు విషయాన్ని చెప్పిన వివాహిత.. వారి సాయంతో తనను గత కొద్ది రోజులుగా వేధిస్తున్న ఎస్ఐ తనతో జరిపిన సంభాషణలను రికార్డు చేసి జిల్లా ఎస్సీకి వాటిని అధారంగా ఇస్తూ ఫిర్యాదు చేసింది.

దీంతో ఎస్ఐని తన కార్యాలయానికి పిలిచిన జిల్లా ఎస్పీ.. అతడికి చివాట్లు పెట్టి.. సస్పెండ్ చేయాలా..? లేక సెలవుపై వెళ్లిపోతావా..? అని అడగడంతో సెలవుపై వెళ్తానని, మరెప్పుడు ఇలాంటి విషయాల్లో తలదూర్చనని హామి ఇచ్చినట్లు సమాచారం. జిల్లా ఎస్సీ కోసం మచిలీపట్నం వెళ్లిన ఎస్ఐ ఇక అటునుంచి అటే సెలవుపై వెళ్లారని తెలిసింది. అయితే బాధ్యతాయుతమైన ఎస్ఐ మహిళల పట్ల ఇంత అసభ్యంగా, అమర్యాదగా ప్రవర్తిస్తే కేసు నమోదు చేయకుండా ఎందుకు వదిలేశారన్న ప్రశ్నలు కూడా వినబడుతున్నాయి. అదే సామాన్యులు ఇలాంటి నేరాలకు పాల్పడితే చట్టం తనపని తాను చేసుకుపోతుందని చెప్పే పోలీసులు తమవారి విషయంలో మాత్రం చట్టాన్ని చుట్టంగా మార్చేశారన్న విమర్శలు కూడా తెరపైకి వస్తున్నాయి.