ఉత్తర్ ప్రదేశ్ లో ఘోరం. నిద్రిస్తున్న అక్కచెల్లెళ్లపై..

Posted: 08/12/2017 10:33 AM IST

ఉత్తర్ ప్రదేశ్ లో ఘోరం జరిగింది. నిద్రిస్తున్న ఇద్దరు యుక్త వయస్సు అక్కాచెల్లెళ్లపై గుర్తు తెలియని అగంతకులు హతమార్చేందుకు యత్నించారు. వారిపై పెట్రోల్ పోసి సజీవదహనం చేసేందుకు ప్రయత్నించారు. బాధితురాళ్ల అరుపులు, కేకలు విన్న కుటుంబ సభ్యులు సకాలంలో స్పందించడంతో వారిని ఆస్పత్రికి తరలించి చికిత్స అందిస్తున్నారు. ఈ దారుణానికి పాల్పడిన అగంతకుల కోసం పోలీసులు అన్వేషణ ప్రారంభించారు.

ఉత్తరప్రదేశ్‌లోని బరేలి జిల్లా నవాబ్ గంజ్ ప్రాంతంలో జరిగిందీ ఘోరం. శుక్రవారం రాత్రి కొందరు దుండగులు తమ ఇంటి తలుపులు బద్దలు కొట్టుకుని లోనికి ప్రవేశించారు. నిద్రపోతున్న ఇద్దరు అక్కాచెల్లెళ్లపై పెట్రోల్ పోసి నిప్పంటించారు. మంటలకు వారు లేచి చూసేసరికి దుండగులు అక్కడినుంచి పారిపోయారు. 18 యేళ్ల గుల్షాన్ పరిస్థితి విషమంగా ఉండగా.. ఆమె చెల్లెలు ఫిజా(17)కు 40 శాతం కాలిగాయాలయ్యాయి.
 
ఈ సంఘటనపై ఫిజా మాట్లాడుతూ... ‘‘ నిందితులు ఎవరో, ఎందుకు వచ్చారో మాకు తెలియదు. ఎవరితోనూ మాకు గొడవలు లేవు. రాత్రిపూట ఒకే మంచంపై నిద్రిస్తున్న మా ఇద్దరికీ నిప్పంటించారు. నేను లేచి వారి ముఖాలు చూసేందుకు ప్రయత్నించినప్పటికీ అప్పటికే పారిపోయారు...’’ అని వెల్లడించింది. దీనిపై పోలీసులు ఇప్పటికే కేసు నమోదు చేశారు. నిందితులను సాధ్యమైనంత త్వరలోనే అరెస్టు చేస్తామని పోలీసులు పేర్కొన్నారు.