ఓటుకు నోటు స్కాం... ఎలక్షన్ రద్దు

Posted: 04/10/2017 08:02 AM IST

ఊహించిందే జరిగింది. ఆర్కే నగర్ ఉపఎన్నికకు సంబంధించి ఓటుకు నోటు వ్యవహారం వెలుగులోకి రావటం తమిళనాడులో కలకలం రేపింది. దీనిపై సమగ్ర విచారణ చేపట్టేందుకు నిర్ణయించుకున్న ఎన్నికల సంఘం ఈ బుధవారం జరగాల్సిన ఎన్నికలను రద్దు చేస్తున్నట్లు ప్రకటించింది. ఆదివారం అంతా భేటీలు నిర్వహించిన ఎన్నికల ప్యానెల్ రాత్రి 10.30 తర్వాత నిర్ణయం ప్రకటించింది.

అధికార అన్నాడీఎంకే ఈ ఎన్నికల కోసం రూ. 90 కోట్ల మేరకు ఓటర్లకు పంచిందన్న ఆరోపణలు వెలువడ్డాయి. దివంగత సీఎం జయలలిత మరణానంతం వారసత్వం కోసం జరుగుతున్న పోరు కావటంతో శశికళ వర్గం ఈ దిగజారుడు చర్యకు దిగిందనే విమర్శలు వినిపిస్తున్నాయి. ఓటుకు 4 వేల చొప్పున మొత్తం 89 కోట్ల రూపాయిలు చెయ్యి మారినట్లు తెలుస్తోంది.

ఎన్నికల్లో డబ్బులు ప్రవహిస్తున్నాయంటూ ఐటీ శాఖకు ఉప్పందించటం, వారు ఆరోగ్యశాఖ మంత్రి విజయభాస్కర్‌, నటుడు శరత్‌ కుమార్‌, ఇంకొందరికి చెందిన 32 ప్రాంతాల్లో ఐటీ సోదాలు జరపటం, పెద్ద ఎత్తున్న డబ్బు స్వాధీనం చేసుకున్న విషయం తెలిసిందే. దీంతో ఈ వ్యవహారం భారీ స్థాయిలోనే ఉండొచ్చని భావించిన అధికారులు ఈసీకి ఓ నివేదిక పంపారు. గత ఏడాది తంజావురు, అరవకురిచి నియోజకవర్గాల్లో జరిగిన ఉప ఎన్నికల్లోనూ  ఇలాంటి ఆరోపణలే రాగా వాటిని కూడా వాయిదావేసిన సంగతి తెలిసిందే.

మొత్తం ఏడుగురు మంత్రులు 35 ప్రదేశాల్లో ఈ తతంగం నడిపించినట్లు సమాచారం.  ఈ ఓటుకు నోటు వ్యవహారంతో శశికళ వర్గానికి చెందిన ముఖ్యమంత్రి పళని స్వామికి ఇబ్బందులు మొదలైనట్లేనని విశ్లేషకులు భావిస్తున్నారు.