వివాదాల రమ్య మరోసారి వార్తల్లోకి...

Posted: 11/29/2016 08:46 AM IST

కాంగ్రెస్ మాజీ ఎంపీ, కర్ణాటక రాహుల్ గాంధీగా పేరుగాంచిన ర‌మ్య మ‌రో వివాదంలో చిక్కుకుంది. మండ్య పర్యటనలో భాగంగా ఓ యువ‌కుడిని దుర్భాష‌లాడిందంటూ పెద్ద గొడవే జరిగింది. రమ్య ప్రవర్తన చూసి చిర్రెత్తుకుపోయిన స్థానికులు కూడా ఆ యువకుడికే మద్ధతుగా నిలవటంతో చివరికి పోలీసులు రంగప్రవేశం చేసి పరిస్థితిని అదుపులోకి తెచ్చారు.

గతంలో మండ్య ఎంపీగా ఉన్న సమయంలో రమ్య 'వ‌న్ ఇండియా.. వ‌న్ ఎంపీ' అనే కార్య‌క్ర‌మానికి రూపకల్పన చేసింది. ప్ర‌జ‌ల స‌మ‌స్య‌లు, వాటికి సరైన ప‌రిష్కార మార్గాలపై థీసిస్ స‌మ‌ర్పించిన వారికి ర‌రూ.2.5 ల‌క్ష‌ల బ‌హుమానం ఇవ్వ‌నున్న‌ట్టు ప్ర‌క‌టించింది కూడా. దీంతో జిల్లా వ్యాప్తంగా 117 మంది యువ‌కులు త‌మ థీసిస్‌ను ఎంపీకి పంపారు. అయితే ఎంపీగా త‌న ప‌ద‌వీ కాలం ముగిసిన త‌ర్వాత ర‌మ్య ఆ విష‌యాన్ని లైట్ తీసుకుంది.

సోమ‌వారం ర‌మ్య క‌లెక్ట‌ర్ కార్యాల‌యానికి వ‌స్తున్న‌ట్టు తెలుసుకున్న థీసిస్ పంపిన వారిలో ఒక‌రైన చిక్క‌మ‌ర‌ళి గ్రామానికి చెందిన పాండుదుదై అనే యువ‌కుడు అక్క‌డికి వెళ్లాడు. ర‌మ్య రాగానే వ‌న్ ఇండియా కార్య‌క్ర‌మంపై మాజీ ఎంపీని నిల‌దీశాడు. దీంతో స్పందించిన‌ ర‌మ్య‌.. తాను ఇప్పుడు ఎంపీని కాద‌ని, ఆ విష‌యాన్ని ప్ర‌స్తుత ఎంపీ వ‌ద్ద తేల్చుకోవాలంటూ సూచించింది. బ‌హుమ‌తి ఇవ్వ‌క‌పోయినా ప‌ర్లేదు కానీ క‌నీసం థీసిస్ పంపిన వారిని అభినందించాల‌ని అతను కోరాడు.

అంతే స‌హ‌నం కోల్పోయిన ర‌మ్య నువ్వు రౌడీలా మాట్లాడుతున్నావంటూ ఆగ్ర‌హం వ్య‌క్తం చేశారు. దీంతో ఇద్ద‌రి మ‌ధ్య వాగ్వాదం చోటుచేసుకుంది. వెంట‌నే క‌ల‌గ‌జేసుకున్న ర‌మ్య మ‌ద్ద‌తుదారులు యువ‌కుడిపై దాడికి దిగారు. స్థానికులు పాండుదురైని ర‌క్షించి ర‌మ్య‌కు వ్య‌తిరేకంగా నినాదాలు చేశారు. విష‌యం తెలుసుకున్న బీజేపీ కార్య‌క‌ర్త‌లు , పోలీసులు క‌లెక్ట‌ర్ కార్యాల‌యానికి చేరుకుని ప‌రిస్థితిని చ‌క్క‌దిద్దారు.