నగ్న ఫోటోలతో యువతికి పెళ్లి ప్రపోజల్

Posted: 11/25/2016 08:37 AM IST

గతంలో వారి మధ్య ఉన్న స్నేహాన్ని ఆసరాగా చేసుకుని తనను పెళ్లి చేసుకోవాలంటూ వేధింపులకు దిగాడు ఓ ప్రబుధ్దుడు. ఆమె ఒప్పుకోకపోవటంతో ఏకంగా నగ్న చిత్రాలతో బ్లాక్ మెయిలింగ్ కు దిగాడు. అంతటితో ఆగాడా అంటే.. అదీ లేదు. ఆ అమ్మాయికి కాబోయే భర్తకి, వారి బంధువులకు కూడా ఆ ఫోటోలు పంచాడు. మరి చివరకు ఆ శాడిస్ట్ ప్రేమికుడి గతి ఏమైందంటే...

బేగంపేటకు చెందిన బోరంచి రాజు అనే యువకుడు బెంగళూరుకు చెందిన ప్రియాంక మిందాల అనే యువతికి నాలుగేళ్ల క్రితం పరిచయమైంది. రాజు పని చేసే ఆఫీస్ లోనే ట్రెయినీగా ఆమె పని చేసింది. ఆపై బెంగళూరు టీసీఎస్ లో జాబ్ రావటంతో తిరిగి వెళ్లిపోయింది. ఇక అక్కడి నుంచి తనను పెళ్లి చేసుకోవాలంటూ రాజు వేధింపులకు దిగాడు. కానీ, ఆ యువతి పట్టించుకోలేదు. ఈ మధ్యే వేరే యువకుడితో నిశ్చితార్థం కూడా జరిగింది. విషయం తెలుసుకున్న రాజు ప్రతీకార చర్యకు దిగాడు.

గతంలో తన ల్యాప్ టాప్ పాడవటంతో రాజుకిచ్చి రిపేర్ చేయించమని ఆ యువతి కోరింది. ఇదే సందుగా భావించిన ఆ యువకుడు అందులోని పర్సనల్ ఫోటోలు, వీడియోలు జాగ్రత్తగా భద్రపరుచుకున్నాడు. అందులో కొన్ని నగ్న ఫోటోలు కూడా ఉన్నాయి. వాటిని ప్రియాంకకు కాబోయే భర్తతో పాటు అతని కుటుంబ సభ్యులకు మెయిల్ చేశాడు. ఈ విషయాన్ని వారు ఆమెకు తెలిపి.. అనంతరం హెచ్‌ఏఎల్ పోలీస్‌స్టేషన్‌లో ఫిర్యాదు చేశారు.

రంగంలోకి దిగిన రెండు ప్రత్యేక పోలీస్ బృందాలు ఫోన్ నంబర్ ఆధారంగా అతన్ని గుర్తించి గురువారం హైదరాబాద్‌లో అరెస్ట్ చేశారు. కాగా, తాను ఇంటెలిజెన్స్ బ్యూరో అధికారినంటూ తమను కూడా ఏమార్చే ప్రయత్నం చేశాడని బెంగళూరు పోలీసులు తెలిపారు.