ముద్రగడ సత్యాగ్రహ పాదయాత్రకు అడ్డంకుల్లేవ్.. ఆటంకాల్లేవ్..

Posted: 11/15/2016 04:28 PM IST

కాపు హక్కుల సాధనే తన జీవిత లక్ష్యంగా పెట్టుకుని, కాపు కులస్థులను బీసీలలో చేర్చి.. ప్రత్యేక రిజర్వేషన్ ఇవ్వాలని డిమాండ్ చేస్తూ ఉద్యమ నేత, మాజీమంత్రి ముద్రగడ పద్మనాభం తలపెట్టిన సత్యాగ్రహ పాదయాత్రకు రాష్ట్రోన్నత న్యాయస్థానం హైకోర్టు పచ్చజెండాను ఊపింది. ఆయన సత్యాగ్రహ పాదయాత్ర చేసినంత మాత్రాన శాంతిభద్రతలకు విఘాతం కలుగుతుందని చెప్పడం సరికాదని ధర్మాసనం వ్యాఖ్యానించింది. దీంతో ఆయన ఈ నెల 16 నుంచి 21 వరకూ తలపెట్టిన సత్యాగ్రహ పాదయాత్రకు పచ్చజెండా వచ్చింది.

ముద్రగడ పద్మనాభం పాద‌యాత్రకు వ్యతిరేకంగా హైకోర్టులో దాఖ‌లు చేసిన‌ ప్రజా ప్రయోజన వ్యాజ్యంపై ఇవాళ మ‌ధ్యాహ్నం మ‌రోసారి విచారించిన హైకోర్టు ముద్రగ‌డ పాద‌యాత్ర నేప‌థ్యంలో శాంతిభ‌ద్ర‌త‌ల‌కు విఘాతం క‌లుగుతుందంటూ ప్రభుత్వం కార‌ణం చెప్పడం స‌రికాద‌ని పేర్కొంది. ప్రజాస్వామ్యంలో శాంతియుతంగా నిరసన తెలిపే హక్కు ప్రతీ ఒక్క పౌరుడికీ ఉంటుందని స్పష్టం చేసింది. ఒకవేళ ఏదైనా శాంతిభద్రతల సమస్యలు వస్తే పోలీసులు చూసుకోవాలని స్పష్టం చేసింది.
 
మరోవైపు ముద్రగడ నేతృత్వంలో కోనసీమలో చేపట్టనున్న సత్యాగ్రహ పాదయాత్ర తీవ్ర ఉత్కంఠ రేపుతోంది. ముద్రగడ దీక్షకు అనుమతి ఇచ్చేది లేదని ఇప్పటికే రాష్ట్ర హోం మంత్రి చిన్నరాజప్ప స్పష్టం చేసిన నేపథ్యంలో.. ప్రభుత్వం నుంచి అనుమతి తీసుకోలేదంటూ ఓ పక్క చెబుతూనే.. మరో పక్క భారీగా పోలీసులను మోహరిస్తున్నారు. శాంతి భద్రతల దృష్ట్యా యాత్రను అడ్డుకోవాలని హైకోర్టులో ప్రజా ప్రయోజన వ్యాజ్యం దాఖలు చేసినా, కోర్టు కూడా ఆయనకు సానుకూలంగా ఉత్తర్వులు వెలువరించింది. దాంతో ఆయన యాత్రపై ఉత్కంఠ నెలకొంది.