చెంచా హత్యలో ఆ యాంగిల్ ఉందా?

Posted: 11/11/2016 05:04 PM IST

కర్ణాటక మైసూర్ సెంట్రల్ జైల్లో ఓ ఖైదీని తోటి ఖైదీ హత్య చేయటంతో పరిస్థితి ఉద్రిక్తంగా మారింది. అయితే దీంట్లో మత కోణం ఉందా అన్న అనుమానాలు కలుగుతున్నాయి. చనిపోయిన వ్యక్తి భజరంగ్ దళ్ కు చెందిన ఓ కార్యకర్త హత్యకేసులో నిందితుడు కావటమే దీనికి కారణం.

కిర‌ణ్ శెట్టి అనే 29 ఏళ్ల వ్య‌క్తి ఓ హ‌త్య‌కేసులో మైసూర్ సెంట్రల్ జైలులో శిక్ష అనుభ‌విస్తున్నాడు. స‌ద‌రు జైలులో ఉన్న మొహమ్మద్ ముస్తఫా(31)అనే మరో ఖైదీతో కిర‌ణ్‌కి గొడ‌వ‌లున్నాయి. గ‌త ఏడాది దక్షిణ కన్నడ జిల్లాలో ఓ భజరంగ్ దళ్ కార్యకర్తను చంపిన నేరంలో ముస్తఫా శిక్ష అనుభవిస్తున్నాడు. కిర‌ణ్ ఇటీవ‌లే జైలు కిచెన్ నుంచి చెంచాను చోరీ చేశాడు. అనంత‌రం దాన్ని నేల‌కు రుద్ది సన్నటి ఆయుధంగా త‌యారు చేసుకున్నాడు.

గురువారం ముస్తఫాకు ఆరోగ్యం బాగోలేకపోవటంతో జైలు నుంచి జైలులోని ప్రాథమిక చికిత్సాకేంద్రం వైపుకు వెళ్ల‌డానికి సిద్ధమవడాన్ని కిరణ్ గ‌మ‌నించాడు. త‌నకూ వంట్లో బాగోలేద‌ని పోలీసుల‌కి చెప్ప‌డంతో అతన్ని కూడా ముస్తఫాతో క‌లిపి ఆసుప‌త్రికి త‌ర‌లించారు. ఇదే స‌మ‌యంలో కిరణ్ తన దగ్గర ఉన్న చెంచాతో ముస్తఫా ముఖం, మెడ, ఛాతిపై కిర‌ణ్‌ చెంచాతో విచ‌క్ష‌ణార‌హితంగా దాడి చేశాడు. రక్తపుమడుగులో కొట్టుకుంటున్న ముస్తఫా త‌న‌ను ఆసుపత్రికి తరలించేలోపే మృతిచెందాడు.

ఈ ఘ‌ట‌న మైసూరులో క‌ల‌క‌లం రేపింది. భజరంగ్ దళ్ కార్యకర్తను చంపాడన్న కారణంగానే ముస్తఫాను మట్టుపెట్టాడని కిరణ్ పై ఆరోపణలు వస్తుండగా, తోటి ఖైదీలు మాత్రం వారిద్దరు ఎప్పటి నుంచో గోడవలు పడుతున్నారని చెబుతున్నారు. ఇక ముస్తఫాను మైసూరు మెడికల్ కాలేజీ మార్చురీ వద్దకు త‌ర‌లించార‌న్న విష‌యం తెలుసుకున్న అత‌డి బంధువులు అక్క‌డ‌కు పెద్ద ఎత్తున చేరుకొని నిరసన చేపట్టారు. ప్రస్తుతం అక్కడ టిప్పు సుల్తాన్ జయంతి వేడుకలు నిర్వహించాల్సి ఉండగా, తాజా ఘటనతో కాస్త ఉద్రిక్త పరిస్థితులు నెలకొన్నాయి.