ITEMVIDEOS: వీళ్లు, వాళ్లు మోసం చేశారు.. ఇక సమరమే..

Posted: 05/28/2016 09:36 AM IST

Harikrishna questions election promises of tdp bjp alliance

ఆంధ్రప్రదేశ్ రాష్ట్రానికి ప్రత్యేక హోదా కోసం ప్రతి ఒక్క తెలుగు పౌరుడు పోరాడాల్సిన తరుణం అసన్నమైందని రాజ్యసభ మాజీ సభ్యుడు, సినీనటుడు నందమూరి హరికృష్ణ అన్నారు. నందమూరి వంశ వీరాభిమానులు, తెలుగువాళ్లు ప్రతి ఒక్కరూ ఏకమై, ప్రత్యేక హోదా గురించి ఐక్యంగా ఉద్యమించాల్సిన సమయం వచ్చిందన్నారు. అలా పోరాడి ప్రత్యేక హోదాను సాధించుకున్న రోజునే అన్నగారికి ఘనంగా నివాళులు అర్పించినట్లు అవుతుందని ఆయన అభిప్రాయపడ్డారు.

ఎన్టీ రామారావు 94వ జయంతి సందర్భంగా ఎన్టీఆర్ ఘాట్‌లో నివాళులు అర్పించిన అనంతరం హరికృష్ణ మీడియాతో మాట్లాడారు. ఆంధ్రప్రదేశ్ కు ప్రత్యేక హోదా ఇస్తామన్న వాళ్లు మోసం చేశారన్నారు. మరి తెస్తామన్న వాళ్లు ఏం చేస్తున్నారో తెలియడం లేదని, మొత్తంగా వీళ్లు వాళ్లు కలసి మనల్ని మోసం చేశారన్నారు. అందరం కలిసి పోరాడి హోదా తెస్తేనే మనం సిసలైన తెలుగు బిడ్డలం అవుతామని ఆయన అన్నారు. ప్రతి ఇంటి నుంచి ఒకరు చొప్పున బయటకు వచ్చి సమరం చేయాలన్నారు.

తెలుగువాడన్న ప్రతి ఒక్కరు ప్రత్యేక హోదా కోసం శపథం చేసి పూనుకోవాలన్నారు. అప్పుడే అన్నగారి ఆశయం నెరవేరుతుందన్నారు. తన తండ్రి జయంతి రోజున ఆయనకు నివాళులు అర్పంచడం మంచి కార్యక్రమని, అంతకన్నా తెలుగుదేశం పార్టీ నిర్వహించే మహానాడు తనకు ఎక్కువ కాదని, అన్నగారిని స్మరించుకోవడాన్ని మించిన ఆనందమేముంటుందని హరికృష్ణ స్పష్టం చేశారు. తెలుగు జాతి మనుగడ ఉన్నంతకాలం ఎన్టీఆర్ చిరస్థాయిగా ఉంటారని.. తెలుగువారి గుండెల్లో గుడికట్టుకున్న మహానుభావుడని కొనియడారు. కాగా తిరుపతిలో టీడీపీ తలపెట్టిన మహానాడు కార్యక్రమానికి హరికృష్ణ గైర్హాజరయ్యారు.

మనోహర్