ఢిల్లీ హైకోర్టు సంచలన తీర్పు.. భర్తను అలా తిట్టిందని భార్యకు విడాకులు

Posted: 03/27/2016 12:38 PM IST

భార్యభర్తల విడాకుల విషయంలో ఢిల్లీ హైకోర్టు సంచలన తీర్పును వెలువరించింది. తాజాగా ఓ భార్యాభర్తల విషయంలో ఆసక్తికర తీర్పును ఇచ్చి అందరినీ ఆశ్చర్యపరిచింది. ఆ వివరాలలోకి వెళితే, గతంలో ఢిల్లీకి చెందిన ఓ వ్యక్తి.. లావుగా ఉండటం, భార్య లైంగిక వాంఛలను సంతృప్తిపరచకపోవడం వల్ల తన భార్య తనను క్రూరంగా హింసిస్తోందని, గున్న ఏనుగు అని తిడుతుందని ఫ్యామిలీ కోర్టును ఆశ్రయించాడు. ఈ నేపథ్యంలో ఆ వ్యక్తికి 2012లో కోర్టు విడాకులు మంజూరు చేసింది.

ఈ ఉత్తర్వులను సవాల్ చేస్తూ ఇటీవల సదరు భార్య ఢిల్లీ హైకోర్టును ఆశ్రయించగా.. ఉన్నత న్యాయస్థానం ఈ కేసులో విడాకులు ఇవ్వడం సబబేనని ఫ్యామిలీ కోర్టును సమర్థించింది. ఈ సందర్భంగా ఢిల్లీ హైకోర్టు దీనిపై వివరణ ఇస్తూ.. లావుగా ఉన్న భర్తని భార్య గున్న ఏనుగు అని తిట్టడం కూడా తప్పేనని, ఈ కారణంతో కూడా భార్య నుంచి భర్త విడాకులు తీసుకోవచ్చని, ఇలా తిట్టడం వైవాహిక బంధాన్ని దెబ్బతీస్తుందని, కాబట్టి ఈ కారణంతో విడాకులు తీసుకోవచ్చునని తీర్పునిస్తూ స్పష్టం చేసింది. చివరగా జస్టిస్ విపిన్ సంఘీ మాట్లాడుతూ.. ఏనుగు, గున్న ఏనుగు, మోటా ఎలిఫెంట్ అన్న తిట్లు, దూషణలతో ఆమె తన భర్త ఆత్మగౌరవాన్ని, ఉత్సాహాన్ని దెబ్బతీసేలా వ్యవహరించిందని పేర్కొనడం గమనార్హం.

మనోహర్