ITEMVIDEOS: బ్రస్సెల్స్ విమానాశ్రామం, మెట్రో స్టేషన్ లో పేలుళ్లు..

Posted: 03/22/2016 01:36 PM IST

బెల్జియం రాజధాని బ్రస్సెల్స్లో జంటబాంబు పేలుళ్లు చోటుచేసుకున్నాయి. రాజధానిలోని ప్రముఖ విమానాశ్రయం జావెంటమ్ ఎయిర్ పోర్ట్ టర్మినల్ బిల్డింగ్ వద్ద రెండు చోట్ల పేలుళ్లు సంభవించాయి. ఈ పేలుళ్ల ధాటికి భవన అద్దాలన్ని బద్ధలయ్యాయి. ఈ ఘటనలో పదకొండుమంది చనిపోగా 22 మంది గాయాలపాలయినట్లు తెలుస్తోంది. వందమందికి పైగా ఈపేలుడు భారిన పడినట్లు సమాచారం. మృతుల సంఖ్య మరింత పెరిగే అవకాశం ఉంది. ఎయిర్ పోర్ట్ లో ఉన్నవారంతా భయాందోళనతో కేకలు వేస్తూ పరుగులు పెట్టారు. ఆ తరువాత బ్రస్సెల్స్ మెట్రో స్టేషన్ లో కూడా మరో పేలుడు సంభవించింది.

అయితే, పేలుళ్ల ఉగ్రవాదుల చర్యగా పేర్కోన్నారు పోలీసులు. హుటాహుటిన ప్రయాణికులను అత్యవసర ద్వారం ద్వారా  బయటకు పంపిన బధ్రతా దళాలు విమానాశ్రయాన్ని మూసివేసి.. తమ అధీనంలోకి తీసుకుని తాత్కాలికంగా మూసివేశారు.ఉగ్రవాదులు విమానాశ్రయంలోనే నక్కి వుంటారని భావిస్తున్న సాయుధ దళాలు వారిని కోసం తనిఖీలు చేస్తున్నారు. అయితే, పేలుళ్లకు ముందు అరబిక్ భాషలో పెద్దగా అరుపులు వినిపించాయని, కాల్పులు కూడా సంభవించాయని కొంతమంది చెప్తున్నారు. టెర్మినల్స్ భవంతుల నుంచి మాత్రం పెద్ద మొత్తంలో పొగ వెలువడుతోంది.

ఇస్లామిక్ స్టేట్ ఉగ్రవాది, ప్యారిస్ లో బాంబుదాడులకు పాల్పడిన సలాహ్ అబ్దెస్లామ్ను బ్రస్సెల్స్ లో నాలుగు రోజుల క్రితం పోలీసులు అరెస్టు చేశారు. కాగా ఇందుకు ప్రతీకార చర్యగా ఐసిస్ ఉగ్రవాదులు బ్రస్సెల్స్ పై తమ ప్రతీకారన్ని తీర్చుకున్నారని పలువురు అనుమానాన్ని వ్యక్తం చేస్తున్నారు. సలాహ్ అబ్దెస్లామ్ను అరెస్టు చేసిన నాలుగు రోజుల్లోనే ఈ ఘటన చోటుచేసుకోవడం కొంత అనుమానానికి తావిస్తోంది. నగరంలో హై అలెర్ట్ ప్రకటించారు. క్షత్రగాత్రులను అస్పత్రికి తరలించి నగరవ్యాప్తంగా నిఘాను ఏర్పాటు చేసింది.

మనోహర్