అక్కడ అంతే.. అనవాయితీ ప్రకారం.. శాసనసభ్యులకు బహుమతులు..

Posted: 03/19/2016 01:26 PM IST

Bihar govt sends freebies to mlas struggles to pay teachers salaries

అక్కడ అంతే.. అదంతా వింత కాదు.. అనావాయితీయే.. నితీష్ కుమార్ లాంటి ముఖ్యమంత్రి వున్నా. యువకిశోరం తేజ్ ప్రతాప్ సింగ్ ఉపముఖ్యమంత్రిగా వున్నా.. బిహార్లో మాత్రం మార్పు కనిపించడంలేదు. ఓ వైపు వేతనాలు అందక ఉపాధ్యాయులు కడుపులు మాడ్చుకుని మరీ విద్యార్థులకు పాఠాలు చెబుతుంటే.. మరోవైపు శాసనసభ్యులకు మాత్రం ఖైరీదైన బహుమతులు బిహార్ ప్రభుత్వం అందజేసింది. దీంతో బిహార్ అసెంబ్లీలో 243 మంది ఎమ్మెల్యేలు శుక్రవారం అత్యంత సంతోషంగా కనిపించారు. అధికార, విపక్ష సభ్యులన్న తేడా లేకుండా అందరి మొహాలు మతాబుల్లా వెలిగిపోయాయి.

బడ్జెట్ సమావేశాలకు హాజరైన సభ్యులకు బిహార్ ప్రభుత్వం ఏళ్లుగా వస్తున్న అనావాయితీ ప్రకారం మైక్రో ఓవెన్లు, సూట్ కేసులు, బ్యాగులు అందజేసింది. బడ్జెట్ సెషన్ లో ఎమ్మెల్యేలకు ప్రతి శాఖ వివిధ బహుమతులు ఇవ్వడం బిహార్ లో రెండు దశాబ్దాలుగా జరుగుతోంది. మైక్రో ఓవెన్లను కానుకలుగా ఇచ్చిన విద్యాశాఖ వీటికోసం రూ.30 లక్షలు వెచ్చించింది. చాలా ఏళ్లుగా ఈ సంప్రదాయం కొనసాగుతోందని విద్యాశాఖ మంత్రి అశోక్ చౌధురి తెలిపారు. దీనిపై స్పందించేందుకు ముఖ్యమంత్రి నితీశ్ కుమార్ నిరాకరించారు.

కాగా ఎమ్యెల్యేలకు గిఫ్ట్ లు ఇస్తే తప్పేంటని డిప్యూటీ సీఎం తేజశ్వి యాదవ్ ప్రశ్నించారు. 'బిహార్ వెనుకబడిన రాష్ట్రం. ఎమ్మెల్యేలుగా ఎన్నికైన వారంతా కోటీశ్వరులు కాదు. పేదలు కూడా ఉన్నారు. ఇలాంటి వారికి కొన్ని కానుకులు ఇస్తే తప్పేంటి. ఈ విషయాన్ని పెద్దది చేయొద్ద' అని సూచించారు. అన్ని శాఖలు కలిపి ఒకే రకమైన కానుక ఇస్తే బాగుంటుందని గతంలో బీజేపీ నేత, మాజీ డిప్యూటీ సీఎం సుశీల్ కుమార్ సూచించినా అధికారులు పట్టించుకోవడం లేదని విశ్వసనీయ వర్గాలు వెల్లడించాయి.

మనోహర్