గెలుపు దిశగా మహాకూటమి.. హ్యాట్రిక్ హీరోగా నితీష్.. అథ్యధికంలో ఆర్జేడీ

Posted: 11/08/2015 01:04 PM IST

బీహార్ ఎన్నికల్లో ఓటరు మహాశయులు మహాకూటమి పక్షానే నిలిచారు. మహాకూటమిలోని లాలూ ప్రసాద్ యాదవ్ పార్టీ రాష్ట్రీయ జనతా దళ్ కు అన్ని పార్టీల కంటే అధికంగా అధిక్యాన్ని కట్టబెట్టనున్నారు. బీహార్ ఎన్నికలలో తమదే విజయమంటూ పోంగిపోయిన కమలనాథుల అంచనాలు తలకిందులయ్యే పరిస్థితి నెలకొంది. ఉదయం మొదలైన ఓట్ల లెక్కింపులో మొత్తం 243 స్థానాలకు గాను 159 స్థానాల్లో మహా కూటమి ఆధిక్యంలోకి దూసుకెళ్లింది.

కౌంటింగ్ ప్రారంభమైన తొలి దశలో ఆధిక్యం కనబరచిన బీజేపీ కూటమి, ఆ తర్వాత ఆ పార్టీ దూకుడు కాస్తంత నెమ్మదించింది. అదే సమయంలో తొలుత సింగిల్ డిజిట్ స్థానాల్లోనే ఆధిక్యం నమోదైన మహా కూటమి సమయం గడుస్తున్న కొద్దీ తన మెజారిటీ స్థానాల సంఖ్యను గణనీయంగా పెంచుకుంది. ప్రస్తుతం బీజేపీ కూటమి కేవలం 74 స్థానాల్లోనే ఆధిక్యంలో కొనసాగుతోంది. దీంతో బీజేపీ కంటే మహా కూటమి ఆధిక్యం ఉన్న స్థానాలు రెట్టింపు సంఖ్య కంటే పెరిగిపోయాయి. వెరసి మహా కూటమి గెలుపు దిశగా పయనిస్తోందనే చెప్పొచ్చు. స్వతంత్ర అభ్యర్థులు 10 స్థానాల్లో ఆధిక్యంలో ఉన్నారు.

జి. మనోహర్