ఆత్మహత్యాయత్నానికి దారి తీసిన ‘ఫేస్‌బుక్’ ప్రేమ!

Posted: 09/15/2015 10:20 AM IST

Facebook love boy pavan kumar suicide attempt telugu crime stories

సామాజిక మాధ్యమాల ద్వారా కొన్ని బంధాలు వికటిస్తుంటే.. మరికొన్ని కొత్త పరిచయాలు అన్యోన్య సంబంధానికి నాంది పలుకుతున్నాయి. కానీ.. ఈ సోషల్ నెట్ వర్కింగ్ వెబ్ సైట్ల ద్వారా అయ్యే కొత్త పరిచయాలు పెడదారి పడుతున్నాయి. ప్రేమ పేరుతో మోసాలు చేయడం, ఇంకా ఇతర దుశ్చర్యలకు పాల్పడటం వంటి ఘటనలకూ ఈ సామాజిక మాధ్యమాలు కేంద్రబిందువుగా నిలుస్తున్నాయి. ఇప్పటికే ఇందుకు నిదర్శనంగా ఎన్నో సంఘటనలు జరగగా.. తాజాగా మరో సంచలన ఘటన చోటు చేసుకుంది. ఫేస్‌బుక్ ద్వారా పరిచయమైన యువతిని ప్రేమించిన యువకుడు తనకి దక్కకపోవడంతో.. ఆ యువతి ఇంటిముందే ఆత్మహత్యాయత్నానికి పాల్పడిన ఘటన తీవ్ర కలకలం సృష్టించింది.

పూర్తి వివరాల్లోకి వెళ్తే.. తూర్పుగోదావరి జిల్లా కాకినాడకు చెందిన పవన్‌కుమార్‌కు ఫేస్‌బుక్ ద్వారా కోవూరుకు చెందిన ఓ యువతితో పరిచయం ఏర్పడింది. అది కాస్త ప్రేమగా మారింది. మూడేళ్లుగా వీరు ప్రేమించుకుంటున్నారు. పవన్‌కుమార్ కోవూరు వచ్చి ఆ యువతిని కలసివెళ్లేవాడు. ఈ క్రమంలో వీరి ప్రేమ వ్యవహారం యువతి కుటుంబసభ్యులకు తెలియడంతో పెళ్లికి ససేమిరా అన్నారు. పరిస్థితి చెయ్యి దాటకముందు మరో యువకుడితో ఆమెకు వివాహ నిశ్చితార్థం జరిపించారు. ఈ విషయం తెలుసుకున్న పవన్‌కుమార్.. రెండు రోజుల కిందట తన తల్లి, సోదరితో కలసి కోవూరు వచ్చాడు. ఆ యువతి తల్లిదండ్రులను పెళ్లికి ఒప్పించేందుకు ప్రయత్నం చేశాడు. కానీ.. వారు నిరాకరించారు. అతడు ప్రేమించిన యువతి కూడా తనను మరిచిపోవాలని అతనికి సూచించింది.

దీంతో తీవ్ర మనస్తాపానికి గురైన పవన్.. ఆమె ఇంటి ముందే పురుగుమందు తాగి ఆత్మహత్యాయత్నం చేశాడు. బాధిత కుటుంబసభ్యులు వెంటనే పవన్‌కుమార్‌ను నెల్లూరులోని ప్రభుత్వాస్పత్రికి తరలించారు. ప్రస్తుతం అతడి పరిస్థితి విషమంగా ఉన్నట్లు సమాచారం.